Àrd-Oifigear eadar-amail dhan Chomunn Ghàidhealach

Thòisich Peigi NicIllinnein ag obair don Chomunn Ghàidhealach bho chionn 26 bliadhna

Dh'ainmich an Comunn Gàidhealach gur i Peigi NicIllinnein Àrd-Oifigear Eadar-amail na buidhne.

Bidh i san dreuchd fad bliadhna, a' gabhail àite Sheumais Ghreumaich, a tha a' gluasad gu dreuchd ùr aig Bòrd na Gàidhlig, an dèidh còrr is 15 bliadhna leis a' bhuidhinn.

Buinidh i do Bhreascleit ann an Leòdhas agus tha i air a bhith ag obair aig a' Chomunn Ghàidhealach bho 1999.

Thug i a-mach ceum ann an Cànan is Cultar na Gàidhlig aig UHI, agus tha i air a bhith na Rùnaire Companaidh agus na Manaidsear Oifis aig a' Chomunn roimhe.

Tha i ag ràdh gur e "urram air leth a th' ann dreuchd Ceannard Eadar-amail a ghabhail os làimh aig àm cho cudromach don Chomunn Ghàidhealach".

Thuirt i: "Tha mi a' coimhead air adhart ri bhith ag obair a' toirt taic do shoirbheachadh leantainneach a' Mhòid Nàiseanta Rìoghail agus adhartachadh na Gàidhlig air feadh Alba."

Fuirichidh Seumas Greumach san dreuchd aige gu pàirt-ùine bhon Lùnastal, gus an tig crìoch air Mòd Nàiseanta Rìoghail na bliadhna seo ann an Loch Abar, nuair a ghabhas Peigi an dreuchd eadar-amail làn-ùine.

Thuirt Magaidh Choineagan, Cathraiche a' Chomuinn Ghàidhealaich: "Tha an t-eòlas a th' aig Peigi mun bhuidhinn, na daoine as aithne dhi agus an dealas aice a' fàgail gur i an neach as fheàrr a ghabhas airson na h-obrach eadar-amail seo.

"Bidh Peigi agus am Bòrd ag obair còmhla thar na bliadhna a tha romhainn a' stiùireadh na buidhne agus a' beachdachadh air an structar as fheàrr don Chomunn Ghàidhealach san ùine fhada."