Seumas Greumach a' fàgail a' Chomuinn Ghàidhealaich

Fhuair Seumas Greumach obair ùr le BnaG ag amas air an cànan a neartachadh sna coimhearsnachdan traidiseanta

Tha Àrd-oifigear a' Chomuinn Ghàidhealaich gu bhith a' leigeil dheth a dhreuchd an ceann beagan mhìosan an dèidh còrr is 15 bliadhna leis a' bhuidhinn.

Tha Seumas Greumach, a th' air a bhith còig bliadhna na cheannard air a' Chomunn Ghàidhealach, air obair ùr fhaighinn le Bòrd na Gàidhlig mar Mhanaidsear Chom-pàirteachaisean Coimhearsnachd.

Thuirt Mgr Greumach: "'S e cothrom air leth a tha seo a bhith ag obair cuide ri agus a' toirt taic do choimhearsnachdan anns na prìomh sgìrean a chaidh ainmeachadh ann am Plana Corporra Bhòrd na Ghàidhlig."

Thuirt e gur "ann le cridhe trom" a tha e a' fàgail a' Chomuinn Ghàidhealaich.

"'S e urram mòr a th' air a bhith ann a bhith nam Àrd-Oifigear aig a' Chomunn a' cur ri leasachadh agus fàs na Gàidhlig agus na h-ealain," thuirt e.

Dh'innis an Comunn Gàidhealach gum bi Mgr Greumach fhathast aig an stiùir ach ag obair pàirt-ùine dhaibh bhon Lùnastal gus am bi am Mòd Nàiseanta Rìoghail ann an Loch Abar seachad.

Tha Magaidh Choineagan, Cathraiche A' Chomuinn Ghàidhealaich, ag ràdh gum bi "ionndrainn air leth air".

Thuirt i: "Tha Seumas air dìleab mhaireannach fhàgail ann an obair a' Chomuinn agus soirbheachas nam Mòdan Nàiseanta agus Ionadail."

Dhearbh i gum bi iad a' sgaoileadh sanas-obrach airson ceannard ùir a dh'aithghearr agus iad a' sireadh "neach a chumas agus a bhrosnaicheas rùn a' Chomuinn Ghàidhealaich ann a bhith a' leasachadh na Gàidhlig agus a cultair".

Thuirt Ealasaid Dhòmhnallach, Ceannard Bhòrd na Gàidhlig, gu bheil iad air leth toilichte gum bi Mgr Greumach ag obair còmhla riutha.

Thuirt i: "Tha an t-eòlas agus na sgilean aige ga dhèanamh na mhanaidsear air leth freagarrach, aig àm nuair a dh'fheumas sinn taic a thoirt do na coimhearsnachdan againn agus an neartachadh."

Gheibhear fiosrachadh mu obair a' Chomuinn Ghàidhealaich an seo.