Newidiadau i dîm Cymru

Dywed Rob Howley bod y fuddugoliaeth yn erbyn y Barbariaid wedi codi hyder y garfan

Mae pedwar newid yn nhîm rygbi Cymru fydd yn wynebu Awstralia y penwythnos hwn i'r un a drechodd Ffrainc i gipio'r Gamp Lawn ym mis Mawrth.

Mae'r pymtheg yn gwbl wahanol i'r tîm ddechreuodd y gêm yn erbyn y Barbariaid yng Nghaerdydd.

Ymhlith y blaenwyr mae Ken Owens yn dechrau fel bachwr yn lle Matthew Rees, ac mae'r ail reng yn gwbl wahanol gyda Bradley Davies a Luke Charteris i mewn yn lle Ian Evans ac Alun Wyn Jones.

Y tu ôl i'r sgrym mae un newid gyda Scott Williams yn dod i mewn fel canolwr i gymryd lle Jamie Roberts sydd ag anaf i'w ben-glin.

Mae'r pymtheg i gyd felly yn wahanol i'r tîm oedd yn fuddugol yn erbyn y Barbariaid yn Stadiwm y Mileniwm yr wythnos ddiwethaf.

'Peryglus'

Dywedodd yr hyfforddwr Rob Howley: "Rydym wedi paratoi ac yn barod am yr her dros y penwythnos.

"Bydd Awstralia yn siomedig wedi iddyn nhw golli i'r Alban, ac fe fydd hynny'n eu gwneud yn fwy peryglus i ni.

"Y Wallabies sy'n dal yn ail yn rhestr detholion y byd, ac rydym yn eu hwynebu ar eu tomen eu hunain.

"Rydym yn gwerthfawrogi mawredd y dasg o'n blaenau - dyw'r ystadegau tymor hir ddim yn edrych yn dda i ni.

"Ond mae'r momentwm gyda ni, ac mae'r fuddugoliaeth yn erbyn y Barbariaid wedi codi hyder ymysg y garfan."

Tîm Cymru v. Awstralia - Dydd Sadwrn, Mehefin 9: Brisbane :-

Olwyr :

15. Leigh Halfpenny (Gleision)

14. Alex Cuthbert (Gleision)

13. Jonathan Davies (Scarlets)

12. Scott Williams (Scarlets)

11. George North (Scarlets)

10. Rhys Priestland (Scarlets)

9. Mike Phillips (Bayonne)

Blaenwyr :

1. Gethin Jenkins (Gleision)

2. Ken Owens (Scarlets)

3. Adam Jones (Gweilch)

4. Bradley Davies (Gleision)

5. Luke Charteris (Dreigiau)

6. Dan Lydiate (Dreigiau)

7. Sam Warburton (Gleision - capten)

8. Toby Faletau (Dreigiau)

Eilyddion :

Matthew Rees (Scarlets), Paul James (Gweilch), Alun Wyn Jones (Gweilch), Ryan Jones (Gweilch), Lloyd Williams (Gleision), James Hook (Perpignan), Ashley Beck (Gweilch)