Yr Ymddiriedolaeth Genedlaethol i ofalu am Dŷ a Gerddi Dyffryn
- Cyhoeddwyd
Adroddiad Luned Gwyn
Mae seremoni'n cael ei chynnal wrth drosglwyddo rheolaeth tŷ a gerddi ym Mro Morgannwg i ofal yr Ymddiriedolaeth Genedlaethol.
Yr ymddiriedolaeth fydd yn rheoli prydles Tŷ a Gerddi Dyffryn am 50 mlynedd o'r mis hwn ymlaen.
Cyngor Bro Morgannwg sydd wedi rheoli'r gerddi ers 1996 ac maen nhw wedi sicrhau dros £6 miliwn o grant Cronfa Treftadaeth y Loteri i adfer y gerddi.
Y cyngor fydd y perchnogion o hyd.
"Mae datblygu gardd odidog yn brosiect tymor hir," meddai Justin Albert, cyfarwyddwr yr ymddiriedolaeth yng Nghymru.
'Angerdd'
"Mae gwaith pawb sydd wedi bod yn gysylltiedig â Gerddi'r Dyffryn ers ei dechreuad - y teulu Cory, Thomas Mawson, Cyngor Bro Morgannwg, Cadw a Chronfa Treftadaeth y Loteri - wedi arwain at safle rhyfeddol.
"Ac mae angerdd gwirfoddolwyr, staff a chefnogwyr wedi bod yn hollbwysig.
Y cyngor fydd y perchnogion o hyd
"Bydd angen yr angerdd ar gyfer cyfnod newydd."
Dywedodd y Cynghorydd Gwyn John, yr Aelod Cabinet dros Hamdden, Parciau, Diwylliant a Datblygu Chwaraeon, fod trosglwyddo rheolaeth yn gam pwysig i ddiogelu dyfodol y tŷ a'r gerddi.
"Mae'r cyngor wedi gwneud gwaith mawr i adfer y tŷ â'r gerddi ers 1996," meddai.
'Cyffrous'
"Yn ogystal ag adfer y gerddi a'r tai gwydr, rydyn ni hefyd wedi datblygu cyfleusterau ardderchog i ymwelwyr ...
"Mae'r lle â dyfodol cyffrous yn rhan o bortffolio'r Ymddiriedolaeth Genedlaethol ac rydyn ni'n edrych ymlaen at weld y gerddi a'r tŷ'n cael eu datblygu.
"Hoffwn ddiolch i bob un o'n staff sydd wedi gweithio ar y prosiect ac i Gronfa Treftadaeth y Loteri am eu cefnogaeth dros y blynyddoedd."
Dywedodd Jennifer Stewart, Pennaeth Cronfa Treftadaeth y Loteri yng Nghymru, fod y tŷ a'r gerddi ymhlith "ein trysorau mwyaf arwyddocaol".
"Rydyn ni'n hynod o falch y bydd dros £6 miliwn yn cael ei fuddsoddi oherwydd arbenigedd a phrofiad yr Ymddiriedolaeth Genedlaethol.
"Fe barhawn ni i weithio'n agos â'r tîm yn Nhŷ a Gerddi'r Dyffryn a'r Ymddiriedolaeth Genedlaethol ac fe edrychwn ymlaen at ail-agor y tŷ yn 2013."
Fe fydd Yr Ymddiriedolaeth Genedlaethol yn gofalu am y tŷ a'r gerddi