Pryder am gau canghennau Barclays Dinbych a Rhuthun

Bydd y gangen yn Rhuthun yn cau ym mis Ebrill

Mae banc Barclays wedi cyhoeddi y bydd yn cau ei ganghennau yn Ninbych a Rhuthun, gan achosi pryder y bydd yr ardal heb fanc o gwbl cyn hir.

Bydd y canghennau'n cau ym mis Ebrill, gyda'r cwmni'n dweud bod mwy yn bancio ar-lein yn hytrach nag ymweld â changen.

Dywedodd y gallai cwsmeriaid ddefnyddio banciau yn Yr Wyddgrug, Llangollen, Y Rhyl a Phrestatyn, neu ddefnyddio rhai gwasanaethau mewn swyddfeydd post.

Mae gwleidyddion Plaid Cymru a'r Ceidwadwyr wedi mynegi pryder y bydd cau'r canghennau yn cael effaith negyddol ar fusnesau'r ardal.

Mae banc NatWest eisoes wedi cau canghennau yn Sir Ddinbych.

• NatWest yn cau naw cangen yng Nghymru

• Banc i gau 11 cangen yn y gogledd

Dywedodd AC Plaid Cymru ar gyfer rhanbarth Gogledd Cymru, Llŷr Gruffydd: "Yn nhermau canol y trefi, mae'n anochel y bydd cau'r canghennau yma'n cael effaith ar nifer yr ymwelwyr am fod llai o bobl yn dod i ganol y dref i ddefnyddio'r banc.

"Beth yw'r goblygiadau ar gyfer busnesau eraill canol y dref?

"Wrth i'r banciau gefnu ar ein trefi, mae angen i ni ddatblygu banc y bobl ar frys yng Nghymru, fydd yn darparu'r gefnogaeth mae busnesau bach a chwsmeriaid ei angen."

Mae AC Ceidwadol Gorllewin Clwyd, Darren Millar hefyd wedi trydar yn dweud ei fod wedi mynnu cyfarfod gyda Barclays ynglŷn â'r penderfyniad.