Agor Pont y Borth yn rhannol ddydd Gwener ar ôl cau yn ddirybudd

Bydd Pont y Borth yn ailagor yn rhannol i geir, beicwyr modur, beicwyr a cherddwyr am 07:00 ddydd Gwener, mae'r llywodraeth wedi cadarnhau.

Rhwng 07:00 a 19:00 dim ond cerbydau hyd at dair tunnell fydd yn gallu croesi, ac fe fydd y bont ar gau dros nos.

Daw hyn ar ôl i'r bont gau yn ddirybudd y penwythnos diwethaf, yn dilyn cyngor brys gan arbenigwyr diogelwch.

Tra bydd y bont ar gau, bydd gwaith ffordd ac ymchwiliadau pellach yn cael eu cwblhau.

Tra bydd y bont ar agor, mae mynediad yn cael ei chyfyngu i gerbydau â phwysau hyd at dair tunnell yn unig.

Bydd mesurau rheoli traffig mewn grym - un llif traffig fydd oddi ar yr ynys yn y bore ac un llif fydd i mewn i'r ynys yn y prynhawn.

Bydd modd i gerddwyr a seiclwyr ddefnyddio'r bont dros nos, ac mae cynllun i ganiatáu mynediad i gerbydau brys mewn lle os nad ydynt yn gallu croesi Pont Britannia.

Roedd busnesau wedi dweud wrth y BBC na allai cau Pont y Borth fod wedi dod ar amser gwaeth i'r ardal.

Dywedodd Rhiannon Elis-Williams o siop Awen Menai ym Mhorthaethwy bod cau'r bont yn cael "effaith fawr iawn" ar ei busnes.

"Oeddach chi'n gweld yn sydyn dros nos bod pobl ddim yn dod i'r siop - mae'n dychryn chi", meddai.

Mae Llywodraeth Cymru wedi ymddiheuro am yr anghyfleustra a diolch i bobl yr ardal am eu hamynedd.

Mae'r llywodraeth yn dweud eu bod wedi cydweithio ag UK Highways A55 DBFO Ltd, Heddlu Gogledd Cymru, Cyngor Gwynedd a Chyngor Môn i greu'r cynllun ailagor.