Tân mewn hen wyrcws yng Nghaerfyrddin yn 'amheus'

Mae Heddlu Dyfed-Powys yn dweud bod tân wnaeth achosi difrod i adeilad hanesyddol yng Nghaerfyrddin yn cael ei drin fel un "amheus".

Cafodd tua 20 o ddiffoddwyr eu galw i'r hen wyrcws ar Heol Brewery am 16:50 brynhawn Gwener.

Wedi'r digwyddiad cafodd dau lanc lleol, 14 ac 15 oed, eu harestio ond maen nhw wedi eu rhyddhau dan ymchwiliad.

Doedd neb wedi eu brifo yn y tân.

• Pobl Caerfyrddin wedi'u 'brawychu a'u siomi' wedi tân

• Tân yn achosi difrod mawr i hen wyrcws Caerfyrddin

Adeilad sy'n dyddio nôl i Oes Fictoria oedd y wyrcws, oedd yn arfer bod yn ganolbwynt i derfysgoedd Merched Beca.

Mae'r heddlu yn gofyn i unrhyw un sydd â gwybodaeth i gysylltu drwy ffonio 101.