Gemau'r Gymanwlad: Efydd i Gymru yn y bowlio lawnt

Bu'n rhaid i Julie Thomas a Gilbert Miles frwydro'n galed am y fuddugoliaeth yn dilyn gornest ddramatig yn erbyn Yr Alban

Mae Cymru wedi ennill medal efydd arall yng Ngemau'r Gymanwlad yn dilyn gêm agos yn erbyn Yr Alban yn y bowlio lawnt.

Llwyddodd Gilbert Miles a Julie Thomas i ennill yn y parau cymysg B2/B3 gyda phêl olaf yr ornest, gan gipio'r fuddugoliaeth o 13-12.

Mae'n golygu bod gan Gymru bellach gyfanswm o 23 medal yng Ngemau Arfordir Aur - saith aur, wyth arian ac wyth efydd.

Bydd rhagor o fedalau yn dilyn yn nes ymlaen yn yr wythnos, wedi i nifer o'r bocswyr hefyd lwyddo yn eu gornestau ddydd Mercher.

Gilbert Miles yn dathlu wedi i'w bêl olaf sicrhau'r fuddugoliaeth i Gymru

Bydd Rosie Eccles yn ymladd am fedal aur wedi iddi ennill ei rownd gynderfynol 69kg, tra bod Mickey McDonagh, Sammy Lee a Lauren Price yn sicr o gael medalau efydd o leiaf.

Mae'n golygu fod Cymru'n saff o gael eu gemau mwyaf llwyddiannus erioed y tu allan i'r DU, gan drechu'r 25 medal gafodd eu hennill yn Auckland yn 1990.

Eu cyfanswm mwyaf erioed oedd y 36 gafodd eu hennill yng Ngemau'r Gymanwlad Glasgow yn 2014.