Ymchwiliad i ddechrau i achos tân mawr ym Mhontypridd
- Cyhoeddwyd
Mae fan i'w weld ar dân ar y safle
Bydd ymchwiliad yn dechrau ddydd Iau i achos tân mawr ym Mhontypridd.
Cafodd dwy ffordd eu cau wedi i'r tân gynnau mewn adeilad un llawr ger Heol Pentrebach tua 17:00 nos Fercher.
Roedd mwg du trwchus i'w weld yn yr ardal, a dywedodd rhai tystion eu bod wedi clywed ffrwydradau.
Cafodd rhai tai eu gwagio ond mae pobl bellach wedi cael dychwelyd iddyn nhw, er bod trigolion wedi eu hannog i gau eu drysau a ffenestri.
Does dim gwybodaeth eto am achos y tân, ond dywedodd yr heddlu na chafodd unrhyw un ei anafu.
Cafodd pedair injan dân eu hanfon i ddiffodd y fflamau, a dywedodd llefarydd ar ran Gwasanaeth Tân ac Achub De Cymru bod "difrod strwythurol sylweddol i'r adeilad".