Dysgwr y Flwyddyn 2018: Adnabod Yankier Perez

Yn ystod wythnos yr Eisteddfod Genedlaethol yng Nghaerdydd bydd enillydd Dysgwr y Flwyddyn 2018 yn cael ei gyhoeddi. Unwaith eto eleni, pedwar sydd wedi dod i'r brig.

Mae Cymru Fyw wedi bod yn eu holi i ddod i'w hadnabod yn well.

Daeth Yankier Pijeira Perez i Gymru o Giwba yn 2011 i ymuno gyda'i wraig, Lowri, ac mae'r teulu'n byw yn Llanrug, Gwynedd.

Pan symudodd i Gymru, aeth ati i ddysgu'r iaith gan fod y Gymraeg yn rhan bwysig iawn o'i gymuned leol, ac erbyn hyn mae'n gweithio fel Technegydd Fferyllfa yn Ysbyty Gwynedd.

Beth yw dy hoff air Cymraeg?

Llanfairpwllgwyngyllgogerychwyrndrobwllllantysiliogogogoch.

Oes yna gamgymeriad ti wastad yn gwneud?

Dwi'n siwr dwi'n gwneud tipyn golew, ella treiglo. Weithiau mae'n medru bod yn anodd i gofio treiglo, ond mae Lowri yn dda iawn i gywiro fi.

Pa berson wnaeth dy ysbrydoli i ddysgu Cymraeg?

Lowri, fy ngwraig, mae hi'n siarad Sbaeneg. Ro'n i'n gwybod fod yr iaith yn bwysig iawn iddi hi. Roedd dysgu yr iaith yn dipyn bach o barch iddi hi, fy nheulu a pobl Cymraeg.

Beth yw dy farn di am bobl sy'n cywiro dy Gymraeg?

Dwi ddim yn cymryd o fel rhywbeth personol, dwi'n meddwl mae o'n ffordd i ddysgu, yn arbennig iaith fel Cymraeg.

Weithiau mae'n medru bod yn anodd i ymarfer achos mae pobl sy'n siarad Cymraeg yn deall Saesneg.

Dwi'n dal i gofio llawer o frawddegau achos fod rhywun wedi cywiro fi, mae o'n rhan bwysig i fod yn rhugl. Mae pobl yn dal i gywiro fy Saesneg rhaid i mi ddweud.

Mae pedwar yn cystadlu yn y ffeinal eleni gan gynnwys Yankier Perez (dde)

Beth yw dy farn am y treigliadau?

Mae'n medru bod yn anodd ond mae pob iaith efo rhywbeth anodd i'w dysgu, dwi'n siwr.

Dydy o ddim mor anodd ag o'n i'n meddwl ar y cychwyn. Mae pawb yn deall beth 'dach chi'n drio ei ddweud hyd yn oed os ydi eich treiglo yn hollol anghywir.

• Dysgwr y Flwyddyn: Pump yn cystadlu

• Dysgwr y Flwyddyn: Adnabod Steve Dimmick

• Emma Chappell yw Dysgwr y Flwyddyn

Sut wnei di ddathlu os ti'n ennill?

Dwi'n meddwl mae yna gyfrifoldeb mawr efo'r wobr. Wrth gwrs 'swn i wrth fy modd a dwi'n siwr y basa ni'n dathlu gyda teulu a ffrindiau, ella parti bach fasa'n neis.

Hefyd, 'swn i'n hoffi gwneud rhywbeth yn Ysbyty Gwynedd, yn arbennig i ddweud diolch i Ceri sy' wedi enwebu fi.

Pa emoji wyt ti?

Mae'n gwestiwn rhyfedd, 'swn ni'n hoffi dweud yr un hapus. Ond ella mae pobl sy'n nabod fi'n gorfod ateb y cwestiwn.

Beth yw'r frawddeg mwyaf rhyfedd ti 'di gweld mewn llyfr dysgu Cymraeg?

Mae pob tiwtor Cymraeg yn gwella ar ôl tipyn bach o frandi.