Fy stori mewn coch: Uno diwylliannau Nigeria a Chymru mewn lluniau

Yn wreiddiol o Idofin, Nigeria, mae'r ffotograffydd Taiye Omokore bellach yn byw yng Nghaerdydd.

Ers symud i Gymru, mae'n canolbwyntio ar bontio ei gefndir Nigeraidd gyda'i brofiadau yng Nghymru drwy ei waith; mewn adrodd straeon, ffasiwn a ffotograffiaeth.

Mae ei lyfr cyntaf, My Story in Red, yn brosiect personol iawn sy'n plethu cynhesrwydd ac egni diwylliant Nigeria gyda thirwedd ac ysbryd Cymru.

Wrth ddefnyddio'r lliw coch i gynrychioli cariad, dewrder a thrawsnewid, mae'r llyfr yn edrych ar hunaniaeth, hiraeth a hunan-fynegiant drwy elfennau symbolaidd fel y gèlè (gorchudd pen) a'r fìlà (cap).

Mae My Story in Red yn dathlu cryfder a harddwch hunaniaeth Nigeria, ac yn gwahodd pobl i ystyried cartref, traddodiad a pherthyn, meddai Taiye.

Yn 2023, cafodd Taiye ei wobrwyo yn Artist Gweledol y Flwyddyn yng Ngwobrau Hanes Pobl Ddu Cymru, ac mae'n gyfarwyddwr golygyddol cylchgrawn Klat sydd yn hyrwyddo artistiaid newydd a lleisiau sy'n cael eu tangynrychioli yng Nghymru a thu hwnt.

Bydd comisiwn diweddaraf Taiye, Dyfodol Du, yn ymddangos yn Llyfrgell Genedlaethol Cymru.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.