Y dylluan druan sy'n chwilio am gartref

Mae gwdihŵ amddifad yn chwilio am gartref newydd ar ôl cael ei ddarganfod ar ochr ffordd ger Aberystwyth.

Cyw bach â'i ben yn eu blu oedd Oscar y dylluan frech (tawny owl) pan ddaeth Melanie Owen o Aberystwyth o hyd iddo.

Cysylltodd Melanie gyda Cymru Fyw i ddisgrifio'r hyn ddigwyddodd:.

"Roedd e ar ochr ein lon, yn oer ac yn rhy wan i hyd yn oed agor ei lygaid," meddai Melanie.

"Cymeron ni fe i mewn 'am y noson' fel y gallai farw mewn llonydd, heb i gath neu gadno gael gafael arno."

Ond wnaeth Oscar oroesi.

"Deg wythnos yn ddiweddarach, mae e wedi tyfu'n llawn ac yn byw mewn aviary adeiladodd fy nhad yng nghornel sied ar ein iard ar y fferm," meddai.

Mae Oscar bellach yn holliach, ond yn cael trafferth gadael ei gartref newydd.

"Mae e'n barod i ddefnyddio ei adenydd a gadael y nyth, felly wnaethon ni adael e gael y rhyddid i grwydro fel oedd e mo'yn," meddai Melanie.

"Yn anffodus, mae tylluanod brech yn diriogaethol iawn ac mae'r lleill yn ymosod arno gyda'r nos. Oherwydd hyn, mae Oscar wedi dod 'nôl i ni ac yn amharod i grwydro rhy bell o'i aviary."

"Rydyn ni wrth ein bodd gyda Oscar gan fod e mor annwyl â gyda phersonoliaeth mor cheeky - mae e hyd yn oed yn ateb i'w enw!

"Ond rydyn ni'n deall bod tylluan yn haeddu mwy na chornel o sied, felly rydyn ni'n edrych am gartref addas iddo fe!"

Dywedodd Melanie ei bod hi'n croesawu cynigion i roi cartref addas i Oscar.

'Nabod rhywun?