Cweir arall i Forgannwg ym Mhencampwriaeth y Siroedd
- Cyhoeddwyd
Perfformiad Ruaidhri Smith oedd yr unig gysur mewn colled drom arall i Forgannwg
Mae tîm criced Morgannwg wedi cael cweir arall ym Mhencampwriaeth y Siroedd yn erbyn Sir Durham yng Ngerddi Soffia.
Ar ôl sgorio 154 yn eu batiad cyntaf, roedd yn rhaid i Forgannwg ymateb i gyfanswm Durham o 295 yn eu batiad nhw.
Ond yn ail fatiad y tîm cartref fe ddaeth ffaeleddau batio Morgannwg i'r amlwg eto.
Cyn i'r glaw ddod â'r chwarae i ben ychydig wedi 18:00 ddydd Llun, roedden nhw wedi sgorio 79 yn unig wrth golli saith wiced.
Ychydig dros hanner awr gymrod hi i Durham gipio'r tair wiced oedd yn weddill, gyda Morgannwg i gyd allan am 111.
Yr unig gysur i Forgannwg mewn perfformiad gwael oedd perfformiad Ruaidhri Smith. Yn ogystal â bod yn brif sgoriwr batiad cyntaf Morgannwg gyda 36, fe gipiodd bum wiced ym matiad Durham.
Mae Morgannwg wedi ennill un gêm yn Adran 2 o Bencampwriaeth y Siroedd gan golli chwech. Maen nhw'n sownd ar waelod y tabl.