A-Y: Gweithgareddau Hanner Tymor
- Cyhoeddwyd
Mae hi'n hanner tymor unwaith yn rhagor, ond beth i'w wneud â'r plant?
Dyma ychydig o ysbrydoliaeth i chi, o A-Y*, sydd ddim am gostio gormod o arian.
(*Roedd rhaid bod yn greadigol gydag ambell i lythyren...)
Amgueddfa
Mae saith safle Amgueddfa Cymru yn rhad ac am ddim, neu beth am ymweld ag un o'r amgueddfeydd lleol.
Beicio
Ewch i grwydro ar ein lonydd beicio a dod i 'nabod yr ardal yn well.
Casglu concers
Mae'n coedwigoedd yn llawn concers ar hyn o bryd... wedyn gallwch eu paratoi a chwarae gyda nhw. (Gwyliwch y cythraul concers.)
Chwarae cuddio
O amgylch y tŷ neu yn yr ardd (os nad yw hi'n rhy fwdlyd o dan draed!)
Dro
Amser gwych i fynd am dro hydrefol a chicio'r dail crin ar y llawr, cyn dychwelyd adref i...
Ddarllen
Beth am ddewis llyfr i drio'i gwblhau cyn diwedd y gwyliau?
Eisteddfod
Pawb i ymarfer eu canu/chwarae piano/dawnsio/llefaru a chynnal eisteddfod bach yn y tŷ.
Fideos
Ar ddiwrnod glawog, gallwch wylio fideos doniol ar y we.
Ffilmio
Eisiau serennu yn eich ffilm neu fideo cerddoriaeth eich hun? Mae hi'n ddigon hawdd gyda ffôn y dyddiau yma.
Golchi'r car
Bydd Mam a Dad wrth eu bodd!
Ng
Os oes unrhyw un yn gallu meddwl am weithgaredd addas sy'n dechrau gyda Ng, cysylltwch...!
Helfa drysor
Cuddio cliwiau o amgylch y tŷ, a'r cyntaf i ddod o hyd i bopeth sy'n ennill.
Iaith
Beth am ddysgu ambell i air o Sbaeneg, Ffrangeg neu hyd yn oed Arabeg neu Rwsieg?
Jig-sô
Y gweithgaredd perffaith i gadw plentyn yn ddiddig am ychydig.
Labordy
Yn mwynhau gwyddoniaeth? Byddai labordy cartref yn wych - ond dim pethau rhy ffrwydrol!
Llyfrgell
Mae mwy na llyfrau yn unig mewn llyfrgell - gallwch hefyd fenthyg gemau, cerddoriaeth a ffilmiau, neu beth am aros am sesiwn stori?
Mabolgampau
Ras gyfnewid, taflu pêl, neidio... Gallwch wahodd ffrindiau a chreu timoedd.
Nofio
Sblash! - gweithgaredd gwych arall i'w wneud os yw hi'n glawio; cysgodwch rhag y glaw, drwy wlychu yn y pwll!
Origami
Pa mor dda ydych chi am wneud siapiau o bapur? Amser ymarfer efallai?
Parc
Mae'r parc yn lle gwych i chwarae a cherdded a chofiwch fynd â...
Phicnic
blasus gyda chi!
Raced
... tenis, badminton neu sboncen - tynnwch y llwch oddi ar eich hen racedi ac ewch am gêm.
Rhoi i elusen
Casglwch eich hen degannau a dillad o amgylch y tŷ a mynd â nhw i siop elusen.
Sbwriel
Ewch i gerdded ar y traeth neu lwybr cyhoeddus lleol i gasglu sbwriel a'i roi yn y bin. Gallwch gael dipyn o ymarfer corff a helpu i achub yr amgylchedd yr un pryd!
Trên
Eisiau antur? Ewch ar y trên i rywle am y diwrnod!
Thema
Dewiswch thema ar gyfer y dydd (y gofod, Peppa Pinc, Canada...), a dysgwch gymaint ag y gallwch chi amdano.
Urdd
Heb ymuno eto? Dyma'ch cyfle, er mwyn sicrhau eich bod yn gallu cystadlu yn yr Eisteddfod neu yn Gemau Cymru y flwyddyn nesa'.
Paentio Wyneb
Beth ydych chi eisiau bod heddiw - Gwrach? Teigr? Spiderman? Mae'r posibiliadau'n ddiddiwedd.
Ysgrifennu llythyr
Mae'n siŵr fyddai Anti Olwen neu Tad-cu Caerfyrddin wrth eu boddau yn derbyn llythyr wedi ei ysgrifennu mewn llawysgrifen dwt!
