Rhybudd melyn am law yn rhannau o Gymru ddydd Mawrth

Mae'r Swyddfa Dywydd wedi cyhoeddi rhybudd y gallai cyfnodau o law trwm achosi trafferthion yn rhannau o Gymru ddydd Mawrth.

Mae'r rhybudd melyn am law yn berthnasol i siroedd de a chanolbarth Cymru rhwng 05:00 a 21:00, ac mae disgwyl gwyntoedd cryf hefyd, yn arbennig ar hyd y glannau.

Yn ôl yr arbenigwyr, fe allai dŵr ar y ffyrdd achosi amodau anodd i yrwyr ac oedi i bobl sy'n teithio ar fysus a threnau.

Mae rhybudd hefyd bod nifer o dai a busnesau'n debygol o ddioddef llifogydd yn sgil tywydd gwlyb diweddar.

Fe allai'r gwynt hyrddio hyd at 40-50 mya yn y canoldir - a hyd at 50-65 mya mewn ardaloedd arfordirol.

Ond mae disgwyl y bydd y tywydd gwaethaf wedi symud tua'r dwyrain erbyn canol y prynhawn

Mae'r rhybudd mewn grym yn y siroedd canlynol:

• Abertawe

• Blaenau Gwent

• Bro Morgannwg

• Caerdydd

• Caerfyrddin

• Caerffili

• Casnewydd

• Castell-nedd Port Talbot

• Ceredigion

• Merthyr Tudful

• Mynwy

• Penfro

• Pen-y-bont ar Ogwr

• Powys

• Rhondda Cynon Taf

• Torfaen