Ymchwiliad yn parhau i ffrwydrad mewn bloc o fflatiau

Cafodd y gwasanaethau brys eu galw i'r fflatiau nos Lun

Mae'r gwasanaethau brys yn ymchwilio i achos ffrwydrad nwy wnaeth achosi difrod sylweddol i floc o fflatiau yng Nghastell-nedd.

Mae dynes oedrannus yn cael triniaeth yn Ysbyty Treforys, Abertawe ar ôl cael llosgiadau yn y digwyddiad yn fflatiau Waun Las, yn ardal Waunceirch.

Cafodd tri o bobl oedrannus eraill loches dros nos ar ôl cael gorchymyn i adael eu fflatiau wedi'r ffrwydrad a ddigwyddodd tua 20:30 nos Lun.

Mae'r awdurdodau yn trefnu llefydd i'r trigolion aros nes bydd yr adeilad yn ddigon saff iddyn nhw allu dychwelyd i'w cartrefi.

Dywedodd Melissa Jeffreys, sy'n byw ger y fflatiau, fod y ddynes sydd yn yr ysbyty "mewn cyflwr ofnadwy - roedd hi wedi colli'r rhan fwyaf o'i gwallt.

"Clywais i ffrwydrad anferth felly edrychais i allan o'r ffenest ac roedd yna fflamau mawr yn dod o'r to. Wnes i alw 999 a rhedeg draw.

"Mae'r to wedi cael ei chwalu'n gyfan gwbl. Mae pawb oedd y tu mewn yn lwcus iawn i fod yn fyw."

Dywed Heddlu'r De nad yw'r anafiadau'r ddynes yn rhai all beryglu bywyd.

Peirianwyr yn gweithio ger safle'r ffrwydrad

Mae'r ymchwiliad i'r digwyddiad yn cael ei gynnal gan Heddlu'r De a Gwasanaeth Canolbarth a Gorllewin Cymu.

Cafodd peirianwyr Wales & West Utilities eu danfon i'r safle nos Lun i ddiffodd y ffynhonell nwy.

Dywedodd llefarydd eu bod "yn helpu'r gwasanaethau brys i ddod o hyd i achos y ffrwydrad".