Ford Pen-y-Bont yn cyflwyno 400 o ddiswyddiadau

Mae cwmni ceir Ford wedi cyhoeddi eu bod ar drothwy proses fydd yn gweld 350-400 o'u gweithwyr yn "diswyddo'n wirfoddol".

Fe fydd y diswyddiadau yn effeithio gweithwyr y safle ym Mhen-y-Bont ar Ogwr.

Yn ôl llefarydd, mae'r cynllun yn rhan o'u hymdrechion i greu "busnes proffidiol a chynaliadwy".

Mae disgwyl i'r diswyddiadau ddigwydd yn ail hanner 2019.

Mae'r cyhoeddiad yn cadarnhau honiadau gan undebau fel Unite a GMB y bydd nifer o weithwyr yn colli eu swyddi yn y ffatri.

Ym mis Mawrth 2017, rhybuddiodd Unite y gall hyd at 1,700 o swyddi gael eu torri yn y ffatri erbyn 2021, ac ar ddechrau 2019, dywedodd GMB eu bod wedi cael gwybod y byd 990 o swyddi'n cael eu torri erbyn 2020.

'Ffrwyth llafur trafodaethau'

Dywedodd lefarydd o gwmni Ford bod y "cynllun yn ffrwyth llafur trafodaethau ag undebau ar gyfateb nifer y gweithwyr gyda disgwyliadau cynhyrchu'r dyfodol".

Mae'r ymddiswyddiadau yn debygol o fod yn ymateb i'r cyhoeddiad na fydd y ffatri yn cynhyrchu injans Jaguar Land Rover o ddiwedd 2019 ymlaen.

Er bod Ford wedi buddsoddi £100m mewn cynhyrchu injan newydd Dragon, y disgwyl yw y bydd hynny ond yn cyflogi tua 500 o'r 1,700 sydd yn cael eu cyflogi yno ar hyn o bryd.

Cadarnhaodd Ford y bydd y gweithwyr sy'n cael eu dewis i ymddiswyddo'n wirfoddol yn gadael y cwmni erbyn 2019.

'Cyfnod anodd' i'r gymuned

Yn ôl ysgrifennydd rhanbarthol Unite Cymru, Peter Hughes, bydd yr undeb yn cefnogi'r staff "yn ystod y cyfnod pryderus ac ansicr hwn".

"Rydym am sicrhau eu bod yn gallu gwneud penderfyniadau clir a chytbwys am eu dyfodol, ac mi fydd gennym adnoddau yn eu lle i gynnig arweiniad a chymorth yn ystod y cyfnod anodd hwn i deuluoedd ac i'r gymuned ehangach," meddai.

Ychwanegodd bydd yr undeb hefyd yn parhau i weithio gyda Ford a Llywodraeth Cymru i geisio dod o hyd i fuddsoddiad arall er mwyn cynyddu'r cyfleoedd gwaith yn y ffatri.

Mae Unite hefyd yn galw ar Ford i flaenoriaethu'r aelodau staff sydd wedi colli swyddi pan fydd galw am "gynhyrchu technoleg hybrid a darnau ar gyfer cerbydau trydan yn y dyfodol" ac "adeiladu ar lwyddiant yr injan Dragon".