Gill i ymuno â phlaid newydd Farage

Fe wnaeth Nathan Gill roi'r gorau i'w sedd yn y Cynulliad Cenedlaethol yn Rhagfyr 2017

Dywed y cyn AC Nathan Gill y bydd yn sefyll fel ymgeisydd ar gyfer plaid Brexit newydd Nigel Farage pe bai'r DU yn oedi y penderfyniad i adael yr Undeb Ewropeaidd.

Mae'r DU i fod i adael ar 29 Mawrth, ond mae yna alwadau wedi bod am oedi er mwy sicrhau cynllun fyddai'n dderbyniol er mwyn osgoi ffin galed yn Iwerddon.

Ar hyn o bryd mae Mr Gill yn Aelod Seneddol Ewropeaidd annibynnol, ac fe fydd etholiadau ar gyfer Senedd Ewrop yn cael eu cynnal ar 23 Mai.

• Nathan Gill yn ymddiswyddo fel AC

Ddydd Gwener fe gafodd Plaid Brexit ei gydnabod fel plaid swyddogol gan y Comisiwn Etholiadol.

Fe gafodd y blaid newydd ei sefydlu er mwyn ymladd yr etholiad pe bai oedi gyda Brexit.

Hyd yn hyn mae'r Tŷ'r Cyffredin wedi gwrthod derbyn cynllun Theresa May i adael yr UE.

Pe na bai'r cynllun yn cael ei gymeradwyo erbyn 29 Mawrth yna bydd y DU yn gadael yr UE heb gytundeb.

Ond mae rhaid aelodau seneddol wedi galw am oedi'r broses.

'Llwybr anghywir'

Dywedodd Mr Gill y byddai oedi Brexit yn annerbyniol a bod yna 60% o bosibilrwydd y byddai etholiadau Ewropeaidd yn cael eu cynnal yn y DU.

"Fe fydd Plaid Brexit yn cymryd pleidleisiau gan etholwyr sy'n anfodlon ac mae'n angenrheidiol i Lafur a'r Ceidwadwyr ddeall, pe bai chi yn ein bradychu yna fe fyddwch yn gorfod wynebu'r goblygiadau yn y blychau pleidleisio," meddai wrth raglen Sunday Supplement, BBC Radio Wales.

Fe wnaeth Mr Gill, gafodd ei ethol i'r Senedd Ewropeaidd fel aelod UKIP, adael y blaid honno ym mis Rhagfyr.

Dywedodd fod UKIP "bellach wed mynd lawr y llwybr anghywir."