Bae Ceredigion: Gwaith cwmni ynni'n 'bygwth bywyd gwyllt'

Ceinewydd ym Mae Ceredigion, sy'n gartref i nifer o ddolffiniaid

Mae cadwraethwyr yn poeni wedi i gwmni ynni rhyngwladol wneud cais i chwilio am olew a nwy oddi ar arfordir Cymru.

Mae Eni UK wedi gofyn i Lywodraeth y Deyrnas Unedig am ganiatâd i ddechrau gwaith chwilio ym Mae Ceredigion.

Ond mae cadwraethwyr yn dweud y gallai'r gwaith hwnnw ladd mamaliaid ifanc yn yr ardal gadwraeth.

Bae Ceredigion sydd â'r nifer uchaf o ddolffiniaid preswyl yn y DU, ac mae'n gartref i filoedd o lamidyddion (porpoise) am gyfnod o'r flwyddyn.

Fe ddywedodd y llywodraeth nad yw'r cynllun wedi ei gymeradwyo eto, a'i fod yn destun asesiad pellach.

'Gwrthwynebu'n gryf'

Ym mis Mawrth, gwnaeth Eni UK gais am ganiatâd i gynnal arolwg daearegol - sy'n cynnwys tanio tonnau swn uchel allan o wn tanddwr - "rywbryd rhwng" 1 Mehefin a 30 Medi.

Cafodd y cais ei baratoi gan Orbis Energy Ltd, sydd wedi cael cais am sylw.

Dywedodd elusen Cadwraeth Morfilod a Dolffiniaid ei bod yn "gwrthwynebu'r cynlluniau'n gryf".

Dywedodd Adran Busnes, Ynni a Strategaeth Ddiwydiannol (BEIS) y llywodraeth fod y cynnig yn destun ymgynghoriad gyda Chyfoeth Naturiol Cymru a'r Cydbwyllgor Cadwraeth Natur.