Deignan yn ennill ras seiclo y Women's Tour
- Cyhoeddwyd
Lizzie Deignan oedd yn fuddugol wrth i ras seiclo merched y Women's Tour ddod i ben yn Sir Gâr.
Llwyddodd Deignan i orffen yn ddiogel yng nghanol y pac cwrso wrth i Amy Pieters o'r Iseldiroedd ennill cymal chwech, y cymal olaf, o Gaerfyrddin i Barc Gwledig Pen-bre, ger Llanelli.
Roedd Deignan ddwy eiliad ar y blaen i Kasia Niewiadoma o Wlad Pwyl.
Ddydd Gwener fe wnaeth y seiclwr gwblhau pellter o 140 cilomedr yng nghymal pump y ras rhwng Llandrindod a Llanelwedd.
Y Women's Tour yw'r ras seiclo bwysicaf i fenywod sy'n cael ei chynnal ym Mhrydain.
Mae'n cael ei chynnal am y chweched tro eleni ers cael ei lansio yn 2014.