Mwy o adar yn cael eu lladd yn anghyfreithlon

Cafodd nifer o gigfrein eu gwenwyno yng Nghymru y llynedd

Dywed y Gymdethas Gwarchod Adar (RSPB) bod y rheolau sy'n gwarchod adar yn cael eu hwfftio wrth i ffigyrau newydd ddangos bod mwy o adar yn cael eu lladd yn anghyfreithlon.

Cafodd pedair gwaith mwy o adar eu lladd yng Nghymru y llynedd o'i gymharu â'r flwyddyn flaenorol.

Yn ôl un o swyddogion ymchwil yr RSPB, Jenny Shelton, mae adar yn cael eu lladd fel arfer am eu bod yn berygl i adar eraill neu anifeilaid sy'n hela.

Dywed y naturiaethwr Iolo Williams ei fod yn "arfer Fictoriaidd sy'n digwydd yn y 21ain ganrif".

Cafodd deg cigfran a brân eu gwenwyno ym Mhowys

'Dim tystion'

Yn 2017 dim ond tri chofnod oedd am ladd adar - gwalch wedi ei wenwyno a barcud a boda wedi'u saethu.

Ond ers hynny mae'r nifer wedi codi'n sylweddol:

• Yn 2018, cafwyd hyd i 11 cigfran a brân wedi'u gwenwyno - un ohonynt yn ardal Wrecsam a'r gweddill ym Mugeildy ym Mhowys;

• Ym mis Mai cafwyd hyd i foda wedi'i saethu yn Nhylwch ym Mhowys a boda arall ym mis Chwefror yn Llanrhaeadr-ym-Mochnant, Powys;

• Roedd yna achos o foda wedi diflannu oddi ar Fynydd Rhiwabon, Wrecsam yn Awst ac un arall yn Chwefror.

Dywed y naturiaethwr a'r cyflwynydd Iolo Williams ei fod wedi cael sioc o glywed am y marwolaethau a bod y math yma o beth yn perthyn i'r gorffennol.

Dywedodd llefarydd ar ran tîm atal troseddu gwledig Heddlu Gogledd Cymru ei bod hi'n "anodd iawn" canfod pwy sy'n gwenwyno adar gan nad oes tystion.