Cymru 'â phopeth' i fod yn adnodd gemau pwysig

Mae Simon Reed (chwith) yn ddarlithydd ym Mhrifysgol De Cymru

Mae dyn sy'n hyfforddi'r genhedlaeth nesaf o ddatblygwyr gemau yn dweud fod popeth yng Nghymru i'w wneud yn adnodd pwysig yn y byd gemau cyfrifiadurol.

Mae'r darlithydd Simon Reed yn ffigwr amlwg yn y diwydiant sy'n ceisio annog Cymru i gymryd mantais o'r farchnad byd eang.

Gyda dim ond 30 o gwmnïau gemau wedi eu lleoli yng Nghaerdydd, mae'r brif ddinas ar ei hol hi i gymharu â dinasoedd eraill yn y DU - fel Bryste sydd gyda 50 o gwmnïau yno.

Ond, mae 65 stiwdio ar hyd a lled Cymru, ac mae rhai yn credu nad oes angen i'r stiwdios fod yn y dinasoedd mawr.

• 'Cwmnïau uncorn Cymreig yn bosib'

• 'Angen i'r Gymraeg fod yn iaith technoleg'

Mae'r diwydiant gemau byd eang yn werth dros £110bn ac mae disgwyl iddo dyfu i £144bn erbyn 2021 , yn ôl y corff UK Interactive Entertinemnt (UKIE).

Mae Caerdydd yn y 16eg safle ar y rhestr o ran nifer y cwmnïau gemau mewn dinasoedd yn y DU.

Ond yn ôl Mr Reed, sy'n darlithio ym Mhrifysgol De Cymru, "Mae'r sgiliau yma, mae'r addysg yma ac mae'r isadeiledd yma".

Does dim rhaid i gwmnïau gemau gael eu sefydlu yn y dinasoedd mawr ddim mwy, yn ôl David Banner (chwith)

Yn ôl David Banner, prif weithredwr Wales Interactive ym Mhen-y-bont ar Ogwr, does dim rhaid i gwmnïau gemau gael eu sefydlu yn y dinasoedd.

"Gyda thechnoleg y we sy'n gwneud y byd yn llawer llai, does dim rheidrwydd i fod yn y dinasoedd mawr mwyach," meddai.

"Rydym yn cystadlu gyda chwmnïau fel Rockstar ac EA. Er ein bod yn gwmni o Gymru, mae ein cynulleidfa yn ymestyn ymhellach na Chymru."

'Cyfle gwych'

Mae Mr Reed yn credu y byddai'n gyfle gwych i economi Cymru: "Rydym wedi gweld yn ddiweddar bod nifer o fyfyrwyr yn sefydlu stiwdios eu hunain yn lleol.

"Maen nhw'n ceisio dod a rhagor o waith i'r economi yn hytrach na symud i ffwrdd ohoni."

Mae disgwyl i Lywodraeth Cymru gyhoeddi adroddiad ddiwedd y flwyddyn ar y sector digidol a sut y dylid cefnogi'r sector sy'n cynnwys gemau cyfrifiadurol.