'Brenin y Gelli', Richard Booth, wedi marw yn 80 oed
- Cyhoeddwyd
Richard Booth tu allan i'w siop yn 1971
Bu farw Richard Booth, y gŵr a drodd y Gelli Gandryll yn brifddinas llyfrau ail-law y byd, yn 80 oed.
Prynodd ei siop lyfrau gyntaf yn hen orsaf y frigâd dân y dref yn 1961.
Yn ei sgîl, fe agorodd nifer o siopau llyfrau eraill yno, gan drawsnewid y dref farchnad yn Fecca ar gyfer llyfrbryfed.
Bu Mr Booth yn gofalu am ei siop tan 2007.
Cymaint oedd ei gariad tuag at y Gelli nes iddo gyhoeddi yn 1977 bod y dref yn deyrnas annibynnol, gydag yntau'n frenin arni, a rhoddwyd pasbort arbennig i bob un o'i thrigolion.
Richard Booth yn 1988
Dywedodd Anne Addyman, o Addyman's Books yn y dref, y byddai colled ar ei ôl.
"Rydym yn drist iawn. Fo fu'n gyfrifol am wneud y dref yma yr hyn ydy hi heddiw," meddai.
"Roedd o'n unigryw ac ar flaen y gad yn trawsnewid yr economi wledig yn y 60au a'r 70au.
"Rydym am roi llyfrau duon yn y ffenestri a chael wythnos o alaru dros Frenin y Gelli."