David Jones i gamu i lawr fel AS Gorllewin Clwyd

Dywedodd David Jones mai gwasanaethu ei etholaeth oedd "anrhydedd mwyaf" ei fywyd

Mae Aelod Seneddol Gorllewin Clwyd, David Jones wedi cyhoeddi na fydd yn sefyll yn yr etholiad cyffredinol nesaf.

Cafodd cyn-ysgrifennydd Cymru ei ethol fel AS yn 2005, a chyn hynny bu'n Aelod Cynulliad rhanbarthol dros Ogledd Cymru am gyfnod yn dilyn ymddiswyddiad Rod Richards.

Bu'r Ceidwadwr hefyd yn Weinidog Brexit i Lywodraeth y DU am gyfnod.

"Yn 67 oed, rwyf wedi penderfynu ei bod hi'n amser i roi gwybod y byddai'n camu o'r neilltu er mwyn galluogi Cymdeithas y Ceidwadwyr Gorllewin Clwyd i ddewis fy olynydd," meddai.

"Ar lefel bersonol, rwy'n gobeithio hefyd treulio mwy o amser gyda fy nheulu, sydd wedi bod yn gefnogol iawn i mi dros yr holl flynyddoedd."

Dywedodd mai gwasanaethu'r ardal oedd "anrhydedd mwyaf fy mywyd", gan ychwanegu y byddai'n parhau i gefnogi'r Prif Weinidog, Boris Johnson gyda thrafodaethau Brexit.