13 o hen siopau Thomas Cook wedi ailagor yng Nghymru

Siop Thomas Cook Aberteifi ar gau ddydd Llun 23 Medi

Mae 13 o hen ganghennau Thomas Cook yng Nghymru wedi ailagor a 150 o staff yn ôl wrth eu gwaith ers i'r busnes ddod dan reolaeth cwmni newydd.

Hays Travel sydd bellach yn gyfrifol am holl safleoedd Thomas Cook drwy'r DU ar ôl dod i gytundeb gyda'r derbynwyr, KPMG.

Daeth cwymp Thomas Cook ym mis Medi wedi misoedd o drafferthion ariannol a methiant i sicrhau cyllid ychwanegol i achub y busnes.

Mae'r perchnogion newydd yn gobeithio cyflogi "gymaint â phosib o'r 2,500 o gyn-weithwyr siopau Thomas Cook o fewn yr wythnosau nesaf, gan ddyblu'i weithlu" ar draws y DU.

"Mae hyn yn gam gwych gan John ac Irene Hays sy'n cael ei werthfawrogi'n fawr - i gamu i'r adwy mor sydyn a diogelu swyddi a bywoliaeth gymaint o bobl ar draws Cymru," meddai Richard Ashford, rheolwr gwerthiant rhanbarthol Thomas Cook yng Nghymru sydd bellach yn rheolwr rhanbarthol Hays Travel yn ne Cymru.

"Ar ran y rhanbarth cyfan, hoffwn ddiolch yn fawr i'r teulu Hays."

Cafodd Hays Travel - sydd â phencadlys yn Sunderland - ei sefydlu 40 mlynedd yn ôl ac roedd yn cyflogi tua 1,900 o weithwyr cyn y cytundeb i achub busnes Thomas Cook.

Dywed y cwmni eu bod "yn falch iawn o gael presenoldeb yng Nghymru am y tro cyntaf".

24 o ganghennau oedd gan Thomas Cook pan fu'n rhaid stopio gweithredu. Dyma'r canghennau sydd wedi ailagor:

  • Aberdâr

  • Aberhonddu

  • Abertawe

  • Caerfyrddin

  • Caerffili

  • Casnewydd

  • Castell-nedd

  • Cwmbrân

  • Llanelli

  • Pen-y-bont ar Ogwr

  • Pontypridd

  • Tonypandy

  • Y Coed Duon

Mae'n fwriad hefyd i agor y canghennau canlynol:

  • Aberteifi

  • Bangor

  • Y Barri

  • Tair cangen yng Nghaerdydd

  • Llanilltud Fawr

  • Maesteg

  • Merthyr Tudful

  • Port Talbot

  • Porth

Straeon perthnasol