Etholiad 2019: 'Yn bendant etholiad Brexit fydd hyn'

Os oes yna un pwnc sy'n hawlio sylw pawb yn yr etholiad yma, Brexit yw hwnnw.

Anghytuno yn Nhŷ'r Cyffredin ar y pwnc yma sy' wedi arwain at gynnal y bleidlais.

Ond ar lawr gwlad beth yw'r farn? A pha mor bwysig yw gadael yr Undeb Ewropeaidd i bleidleiswyr?

'Gadael pobl mewn limbo'

Mae Graham Adams o Dycroes ger Rhydaman wedi hen flino ar yr oedi a'r cecru. Roedd o blaid aros, ond erbyn hyn mae am weld Brexit yn digwydd er mwyn dod â'r ansicrwydd i ben.

"Pleidleisio i aros 'nes i yn y bleidlais Brexit gyntaf, o'n i yn eitha' hapus i fod yn rhan o bopeth o'n i yn gyfarwydd â fe," meddai.

"Erbyn hyn fi dal moyn aros, ond gan bod tair blynedd wedi mynd a'r penderfyniad oedd i adael, fi'n teimlo nawr dyle ni symud 'mlaen a gadael.

"Ar ôl y bleidlais gynta' bydde ni di bod yn hapus i gael refferendwm arall i weld a oedd pobl wedi newid eu meddwl, ond nawr ar ôl tair blynedd ma' ishe symud 'mlaen a gadael.

"Mae'n mynd i ddigwydd, felly 'run man bo' ni jyst yn mynd trwyddo yn hytrach na bod amser yn dal i fynd 'mlaen a gadael pobl mewn bach o limbo."

• Pam nad yw pobl ifanc yn cael pleidleisio?

Ai etholiad yw'r ateb?

"Roedd clywed am etholiad yn sioc… ddim yn disgwyl hynna," meddai.

"Ond, yn bendant etholiad Brexit fydd hyn a bydd e i gyd lawr i be' sy' gan bobl i ddweud am bwyti Brexit."

'Pobl wedi cael llond bol'

Mae Peter Gilbey o Ystradgynlais yn wreiddiol ond bellach yn byw yng Nghaerdydd.

Mae wedi ymgyrchu o'r dechrau'n deg yn erbyn Brexit a dyw e ddim wedi newid ei feddwl. Mae'n bendant iawn bod rhaid aros yn yr Undeb Ewropeaidd.

"I fod yn onest fi yn eitha' depressed i weld bod etholiad arall yn dod. Y peth fi yn ffindo fwya' diflas yw sut i ni yn pleidleisio mewn etholiad i San Steffan.

"Dyw y system ddim yn ddemocrataidd iawn, dyw 'first past the post' ddim yn safon digon uchel ar gyfer democratiaeth."

• Etholiad 2019: Sut ddyliwn i bleidleisio?

"Mae'n anodd gweld refferendwm arall yn digwydd… os bydd senedd grog, wel efallai wedyn, ond mae'n anodd dweud.

"Fi yn credu bod pobl wedi cael llond bol o be' sy' mynd mlaen, ond mae pobl wedi cael llond bol o bleidleisio hefyd."

Ni chafodd sioc o glywed y byddai etholiad: "Ers cafodd Theresa May ei threchu am y trydydd tro, 'nes i feddwl efallai bydd refferendwm, ond collodd hi lot o bŵer ar ôl hynny ac yn gyflym wedyn weles i bod dim siawns iddi gario mlaen.

"O weld hynna a gweld bod arweinydd newydd i'r Ceidwadwyr, o'n i yn gwbod bydde etholiad cyn bo hir."

'Llanast llwyr'

Barn wahanol iawn sy' gan Deiniol Carter, sydd o Gernyw ond nawr yn gweithio yng Nghaerdydd.

Mae e â'i fryd ar adael yr Undeb Ewropeaidd, ond mae'n dweud bod "llanast llwyr ar y funud".

"Dydy e ddim yn amlwg be' fydd yn digwydd. Ond, rwy dal o blaid Brexit, heb newid fy meddwl o gwbl.

"Gobeithio bydd Brexit yn digwydd oherwydd mai dyna oedd canlyniad y refferendwm, felly rwy'n disgwyl bydd Brexit yn digwydd ond ddim yn hollol sicr."

• Mwy o straeon am Etholiad 2019

Er hynny, mae Deiniol o blaid refferendwm ar y cytundeb neu adael geb gytundeb: "Efallai erbyn hyn mae angen gofyn hynny i bobl.

"Ond dwi ddim ishe gweld y refferendwm jyst yn dro pedol am y tair blynedd ddiwetha' achos roedd y canlyniad yn glir. Roedd e'n agos rwy'n gwybod, ond yn glir."

"Mae tri etholiad wedi bod mewn tair blynedd... mae rhai o fy ffrindiau 'di dweud bod nhw ddim yn sicr a fyddan nhw yn pleidleisio ai peidio oherwydd eu bod nhw wedi cael llond bol, a dy' nhw ddim yn siŵr a fydd etholiad neu refferendwm arall yn ateb y broblem.

"Efallai bod pobl jyst ishe symud ymlaen."