'Uchelwydd i dyfu yng Nghymru yn sgil cynhesu byd-eang'
- Cyhoeddwyd
Mae uchelwydd yn tyfu'n dda mewn gerddi plasty Llanerchaeron yr Ymddiriedolaeth Genedlaethol ger Llambed
Mae garddwr wedi dweud y gallai cynhesu byd-eang achosi uchelwydd i dyfu yn y gwyllt yn rheolaidd yng Nghymru cyn hir.
Mae'n gyffredin mewn perllannau a choed eraill yn Lloegr, ond anaml mae'n ymddangos yn naturiol ar goed yma.
Mae Karl Showler, 84, sy'n byw yn Aberhonddu, wedi cymryd diddordeb brwd yn y planhigyn ers pan oedd yn ifanc.
Mae Mr Showler wedi ysgrifennu am uchelwydd ar gyfer y Gymdeithas Arddwriaethol Frenhinol.
Dywedodd ei fod yn "ddirgelwch" pam nad yw uchelwydd yn tyfu'n aml yng Nghymru.
Mae Karl Showler wedi ysgrifennu am uchelwydd ar gyfer y Gymdeithas Arddwriaethol Frenhinol
Unig ddamcaniaeth Mr Showler ydy bod uchelwydd yn tyfu'n well yn Lloegr am ei bod hi fymryn yn gynhesach yno.
"Ond os ydy cynhesu byd-eang yn gwneud Cymru'n gynhesach yna mae'n debygol iawn y bydd yn tyfu'n naturiol ar y coed maen nhw'n hoffi yng Nghymru," meddai.
"Newyddion da i'r rheini sy'n hoff o gusan adeg y Nadolig."