Cwpan FA Lloegr: QPR 5-1 Abertawe

Mae Abertawe allan o Gwpan FA Lloegr wedi iddyn nhw gael eu trechu gan Queens Park Rangers yn Loftus Road ddydd Sul.

Dyma ail fuddugoliaeth QPR yn erbyn tîm o Gymru yn barod eleni - ddydd Calan fe drechodd y tîm o Lundain yr Adar Gleision 6-1 yn y Bencampwriaeth.

Jordan Hugill sgoriodd y gôl gyntaf i QPR ddydd Sul ac o fewn saith munud daeth ail gôl gan Bright Osayi-Samuel.

Cyn hanner amser roedd yna gôl arall i Hugill, cyn i'r Elyrch sgorio eu hunig gôl wedi awr o chwarae, gyda George Byers yn sgorio o 20 llath.

Ond doedd QPR ddim am ildio - Wedi 76 munud roedd gôl arall iddyn nhw gan Lee Wallace ac yn y munudau olaf daeth pumed gôl - y tro hwn gan Josh Scowen.