Fandaliaid yn targedu canolfan bywyd gwyllt yn Sir Benfro

Cafodd y cerflun 'Helyg' ei osod yn y ganolfan bum mlynedd yn ôl

Dywed gwirfoddolwyr a staff canolfan bywyd gwyllt yng Nghilgerran, Sir Benfro, eu bod wedi eu digalonni yn dilyn difrod dibwrpas i gerflun anferth o fochyn daear.

Cafodd y difrod ei ddarganfod ar Ddydd Calan - y diweddaraf mewn cyfres o ymosodiadau ar safle Canolfan Bywyd Gwyllt Cymru, gan gynnwys un achos o gynnau tân yn fwriadol.

Fe wnaeth y tân hwnnw ddinistrio arsyllfa adar.

Dywed Ymddiriedolaeth Natur De a Gorllewin Cymru fod y difrod cyson yn golygu fod llai o arian ar gael ar gyfer gwaith cadwraeth bywyd gwyllt.

"Mae'n rhwystredig ar ôl gweithio drwy'r flwyddyn a dod yma a gweld hyn," meddai Keith Thomas, Cadeirydd y gwirfoddolwyr.

"Does yna ddim rheswm i'r peth. Mae pobl yn ypset iawn."

Fe gafodd rhannau o'r cerflun eu rhwygo yn yr ymosodiad

Mae 'Helyg', y cerflun o'r mochyn daear, wedi bod yn y ganolfan ers pum mlynedd.

Dywedodd rheolwr y ganolfan, Mark Hodgson: "Mae'n drist iawn - mae tu hwnt i reswm pam fod hyn yn parhau i ddigwydd.

"Mae'n peryglu gwaith cadwraethol.

"Mae'n rhaid i ni wario arian ar atgyweirio, ac mae hynny yn cael effaith uniongyrchol ar y gwaith cadwraethol rydym yn gallu ei wneud yng Nghymru."

Dywedodd yr ymddiriedolaeth y byddan nhw'n ehangu eu rhwydwaith o gamerâu cylch cyfyng yn y ganolfan.

Maen nhw hefyd yn dweud fod yr heddlu wedi cynyddu eu presenoldeb yn yr ardal.