Y Bencampwriaeth: Middlesbrough 0-3 Abertawe

Rhian Brester yn sgorio ail gol Abertawe

Fe wnaeth Abertawe greu cryn argraff wrth i'r Bencampwriaeth ailddechrau gan ysgubo Middlesbrough o'r neilltu.

Sgoriodd Rhian Brewster, sydd ar fenthyg o Lerpwl, ddwywaith yn yr hanner awr agoriadol, gydag Andrew Ayew yn ychwanegu cic o'r smotyn.

Yn ogystal, fe wnaeth Abertawe lwyddo i daro'r postyn ddwywaith hyd yn oed cyn sgorio.

Ar ôl dim ond chwe munud fe darodd ymdrech Aldo Kalulu yn erbyn y postyn.

Ar ôl dweud hynny roedd y chwaraewr yn lwcus i aros ar y cae, ar ôl iddo gael cerdyn melyn ychydig cyn yr egwyl am dacl flêr.

Daeth y gôl gyntaf ar ôl 18 munud yn dilyn rhediad cryf gan Ayew, a'i groesiad yn dod o hyd i Brewster.

Daeth yr ail dri munud yn ddiweddarach, foli gan Brewster y tro hwn wedi croesiad Kalulu.

Roedd Abertawe yn rheoli'r chwarae, a daeth y drydedd ar ôl trosedd ar Conor Gallagher yn y blwch cosbi.

Aeth hi'n dawelach yn yr ail hanner, ond bron i'r Elyrch ymestyn eu mantais ar ddiwedd y gêm.

Fe darodd ymdrech George Byers oddi ar y postyn, gyda Joradan Garrick a Bersnat Celina yn methu manteisio.

Golygai'r canlyniad fod Abertawe yn codi' i'r seithfed safle, un y tu ôl i Preston yn safleoedd ail-gyfle, ar wahaniaeth goliau.