Y Bencampwriaeth: Abertawe 0-1 Luton Town

Roedd yna dipyn o dymer ymhlith y chwaraewyr wedi'r gôl gyda Jordon Garrick yn cael ei anfon o'r cae

Roedd disgwyliadau mawr ar ysgwyddau Abertawe wrth iddynt herio Luton Town, sydd ar waelod y Bencampwriaeth.

Pe bai Caerdydd a Preston wedi cael gêm gyfartal, byddai buddugoliaeth i Abertawe wedi eu codi i blith y timau ail-gyfle.

Ond nid oedd Luton yn barod i ildio i obeithion Abertawe.

Gyda'r Cymro Nathan Jones yn rheoli roedd Luton am ddiogelu eu lle yn y Bencampwriaeth. Y Gwyddel James Collins wnaeth y gwaith angenrheidiol i Luton gyda pheniad grymus i gornel dde y rhwyd ar ôl croesiad gan Isaiah Brown ar ôl 72 o funudau.

Roedd yna ddigon o waith i'r dyfarnwr wedi'r gôl wrth i Mpanzu o Luton gael cerdyn melyn a Garrik o Abertawe gael cerdyn coch.

Gyda dim ond saith munud ar ôl a deg chwaraewr ymdrechodd yr Elyrch yn galed ond ar waethaf ymdrechion Grimes, Wilmot, Gallagher a Routlidge yn y naw munud dros y 90, methiant fu ymdrech yr Elyrch a cholli oedd eu hanes.

Degfed safle

Mae'r Elyrch felly wedi syrthio i'r degfed safle - bedwar pwynt tu ôl i Gaerdydd.

Mae Caerdydd wedi codi i blith y timau ail gyfle wedi iddynt gael buddugoliaeth yn Preston.

Y tro diwethaf i'r Abertawe a Preston gyfarfod oedd ym mis Rhagfyr - yr Elyrch oedd yn fuddugol y tro hwnnw wedi gôl hwyr gan Andre Ayew.