Rhybuddion melyn am wynt a glaw dros y penwythnos
- Cyhoeddwyd
Mae'r Swyddfa Dywydd wedi cyhoeddi cyfres o rybuddion tywydd ar gyfer y penwythnos fydd yn effeithio ar fwyafrif Cymru.
Daw rhybudd melyn am law trwm i rym o 00:00 tan 14:00 ddydd Sadwrn, sy'n berthnasol i bob sir heblaw Sir Y Fflint.
Ddydd Sadwrn hefyd mae yna rybudd am wyntoedd cryfion - rhwng 06:00 a 21:00 - mewn wyth sir, sef Abertawe, Caerfyrddin, Ceredigion, Conwy, Gwynedd, Penfro, Powys ac Ynys Môn.
Rhybudd melyn am law sydd wedi'i gyhoeddi ar gyfer y cyfnod rhwng 18:00 nos Sul a 06:00 bore Llun, sydd eto'n debygol o syrthio ymhob sir heb law am Sir Y Fflint.
Gall yr amodau greu trafferthion i deithwyr, llifogydd lleol, a thoriadau yng nghyflenwadau trydan.
Map y rhybudd melyn am law ddydd Sadwrn