Y Bencampwriaeth: Brentford 1-1 Abertawe
- Cyhoeddwyd
Andre Ayew yn dathlu wedi iddo sgorio i ddod ag Abertawe yn gyfartal yn erbyn Brentford
Rhwydodd Andre Ayew yn yr ail hanner wrth i Abertawe ymestyn eu rhediad di-guro oddi cartref gyda phwynt yn Brentford.
Roedd degfed gôl o'r tymor gan Ivan Toney wedi rhoi Brentford ar y blaen yn yr hanner cyntaf ar ôl i Kyle Naughton ac Ayew fynd yn agos i'r ymwelwyr.
Cafodd Jamal Lowe gyfle da i'r Elyrch yn fuan yn yr ail hanner ond bu'n rhaid disgwyl tan y chwarter awr olaf am y gôl gyfartal.
Sgoriodd Ayew o groesiad gan yr eilydd Matt Grimes, gyda phumed gôl o'r tymor yr ymosodwr o Ghana yn sicrhau pwynt i dîm Steve Cooper.
Mae'r canlyniad yn golygu bod Abertawe yn ymestyn eu rhediad di-guro i bum gêm cyn wynebu Norwich ddydd Sadwrn.