Dedfrydu dyn am ymddygiad afreolus mewn siop Tesco

Mae dyn a rwygodd lieniau plastig oedd yn gorchuddio dillad mewn archfarchnad ym Mangor wedi cael gorchymyn i wneud 250 awr o waith di-dal yn y gymuned.

Roedd Gwilym Owen, 28 oed o Gaerwen, Ynys Môn, yn protestio am waharddiad Llywodraeth Cymru ar werthu nwyddau oedd ddim yn hanfodol yn ystod y cyfnod clo byr ddiwedd Hydref.

Plediodd yn euog o ddifrodi'r plastig ac o ymddygiad afreolus yn y siop ar 23 Hydref.

Dywedodd ei gyfreithiwr wrth y llys ei fod wedi cael cefnogaeth gan rai, ond beirniadaeth gan eraill, a'i fod yn derbyn bod ei weithred wedi rhannu barn.

Dywedodd Gilly Harradence wrth ynadon Caernarfon fod y rheolau wedi eu haddasu ychydig ddyddiau'n ddiweddarach, ac nad oedd wedi mynd i'r siop gyda'r bwriad o achosi trafferth.

Fe wnaeth cadeirydd yr ynadon ddyfarnu £200 o iawndal i Tesco a gorchymyn Owen i dalu costau o £180.

Dywedodd wrth Owen: "Doeddech chi'n malio dim am ddiogelwch a lles y staff na chwsmeriaid yn y siop. Mae'n rhaid bod eich gweithredoedd wedi achosi ofn i nifer o bobl o'ch cwmpas."

Ychwanegodd fod Owen wedi mynd i'r siop i amharu ar y busnes yn "faleisus", a'i fod wedi defnyddio "iaith gas a ffiaidd".

Gadawodd Owen y llys heb wneud unrhyw sylw.