Elusen yn sicrhau fod pobl ag anableddau yn cael gyrru

Mae elusen o Sir Ddinbych yn helpu mwy o bobl ag anableddau i fod yn symudol wrth iddyn nhw addasu nifer cynyddol o geir.

Cyn hir, mae Disability Resource Centre ym Modelwyddan yn gobeithio arddangos cerbyd newydd yn y gymuned.

Maen nhw wedi bod yn rhoi cyngor ac yn darparu offer pwrpasol i bobl ag anabledd ers 30 mlynedd.

Yn ddiweddar maen nhw wedi prynu cerbyd newydd er mwyn dangos ei bod hi'n bosib i unrhyw un sydd ag anabledd yrru cerbyd.

Yn y cerbyd newydd, er enghraifft, mae seddi sy'n gallu cylchdroi a sbardun a breciau y gellir eu rheoli â llaw.

Y nod, medd y cynhyrchwyr, yw dangos i bobl sydd ag anableddau fod modd iddyn nhw yrru a bod hi'n bosib addasu cerbyd i'w gofynion.

Un o'r ceir y mae'r elusen wedi ei addasu

Dywed Tim Cowsill o'r elusen: "Yr hyn ry'n yn ei wneud yn gyntaf yw asesu pobl ac yna ry'n yn teilwra cerbyd i gwrdd â gofynion pob unigolyn.

"Mae anableddau pobl yn wahanol - ond mae'r ffordd ry'n ni gyd yn gyrru car yn wahanol, lle 'dan ni angen y sedd ayyb."

Unwaith y bydd cyfyngiadau Covid wedi llacio y bwriad yw mynd â'r cerbyd newydd i'r gymuned er mwyn dangos i bobl sydd ag anableddau beth sy'n bosib.

Mae addasu'r car yn gallu bod yn ddrud ond fel arfer mae elusen Motability yn talu am y gwaith wedi i anghenion unigolyn gael eu hasesu.

'Dim rhyddid heb y car'

Cafodd James Lusted, cyflwynydd Songs of Praise, actor a chynghorydd ar Gyngor Sir Conwy ei eni â chyflwr sy'n golygu nad yw wedi gallu tyfu.

Dywed ei fod yn hynod ddiolchgar i'r ddwy elusen am sicrhau fod ganddo gar arbennig sy'n ei alluogi i deithio.

Heb y car ni fyddai'n bosib i fi weithio, medd James Lusted sy'n cyflwyno Songs of Praise

"Heb y car fe fyddwn i'n colli fy annibyniaeth," meddai, "a fyddwn i'n methu gwneud y swyddi dwi'n eu gwneud - sef cyflwyno, actio ar y llwyfan a bod yn gynghorydd.

"Dwi'n gallu g'neud popeth fel pawb arall ond mewn ffyrdd gwahanol. Heb y car fyddwn i ddim yn gallu cael diwrnodau allan gyda'r wraig a'r ferch.

"Mae o'n hynod bwysig bod pobl ag anableddau yn cael pob cyfle i yrru - yn y car sydd gen i mae pedalau hwy, clustogau arbennig ar y sedd ac mae yna fecanwaith hefyd i godi'r gadair olwyn. Heb y car fe fyddwn wedi colli fy rhyddid."