Cyn-gapten Cymru, Ashley Williams yn ymddeol o bêl-droed
- Cyhoeddwyd
Sgoriodd Williams ddwy gôl i Gymru - un ohonynt yn erbyn Gwlad Belg yn rownd wyth olaf Euro 2016
Mae cyn-gapten Cymru, Ashley Williams wedi cyhoeddi ei fod yn ymddeol o bêl-droed proffesiynol.
Mae Williams, 36, wedi bod heb glwb ers iddo gael ei ryddhau gan Bristol City ar ddiwedd y tymor diwethaf.
Enillodd yr amddiffynnwr 86 o gapiau dros Gymru, gan arwain y tîm i rownd gynderfynol Euro 2016.
Er iddo ddechrau ei yrfa broffesiynol yn hwyr, fe wnaeth Williams chwarae 741 o gemau i glybiau fel Abertawe, Everton a Stoke.
Caniatáu cynnwys X?
Mae’r erthygl yma’n cynnwys elfennau sydd wedi eu darparu gan X. Gofynnwn am eich caniatâd cyn eu llwytho, oherwydd fe allai wneud defnydd o cwcis a thechnolegau eraill. Efallai y byddwch am ddarllen polisi cwcis X, dolen allanol a pholisi preifatrwydd, dolen allanol cyn derbyn. I weld y cynnwys yma dewiswch ‘derbyn a pharhau’.
Dywedodd Williams ei fod wedi dod i'r penderfyniad ar ôl "ystyried cynigion diweddar i barhau i chwarae".
"Bod yn gapten ar Gymru yn rownd gynderfynol Pencampwriaethau Ewrop yn 2016 oedd fy nghyflawniad gorau, ac mae'n rhywbeth na fydda i fyth yn ei anghofio," meddai.
"Rydw i eisiau diolch i fy nghyd-chwaraewyr, rheolwyr, staff a'r holl gefnogwyr."
Fe wnaeth Williams ennill 86 o gapiau rhyngwladol - 53 o'r rheiny fel capten
Fe ddechreuodd Williams ei yrfa yn Hednesford Town a Stockport County cyn arwyddo i Abertawe yn 2008.
Ar ôl wyth mlynedd gyda'r Elyrch fe symudodd i Everton cyn ymuno â Stoke ar fenthyg yn 2018.
Wedi iddo gael ei ryddhau gan Everton ar ddiwedd tymor 2018-19 ymunodd â Bristol City ar gyfer ei dymor olaf fel chwaraewr proffesiynol.
Wedi'i eni yn Wolverhampton, roedd Williams yn gymwys i gynrychioli Cymru trwy ei dad-cu, oedd yn dod o'r Rhondda.
Enillodd ei gap rhyngwladol cyntaf yn 2008 yn ystod cyfnod John Toshack wrth y llyw, ac aeth ymlaen i ennill 86 o gapiau - 53 o'r rheiny fel capten.