Yr Urdd yn cyhoeddi trefniadau Eisteddfod T 2021

Trystan Ellis-Morris a Heledd Cynwal yn cyflwyno un o raglenni Eisteddfod T y llynedd

Mae'r Urdd wedi cadarnhau y bydd gŵyl ddigidol yn cael ei chynnal yn ystod hanner tymor y Sulgwyn am yr ail flwyddyn yn olynol.

Cyhoeddwyd ym mis Rhagfyr na fydd Eisteddfod yr Urdd 2021, oedd fod i gael ei chynnal yn Sir Ddinbych, yn mynd yn ei blaen fel yr arfer oherwydd sefyllfa coronafeirws.

Cafodd yr ŵyl ei gohirio y llynedd hefyd oherwydd y pandemig, ac yn hytrach cafodd Eisteddfod T ei chynnal lle'r oedd plant yn cystadlu o adref.

Dywed y mudiad y bydd yr Eisteddfod T eleni yn "fwy arbrofol, blaengar a chyffrous".

Fe wnaeth 6,000 o blant a phobl ifanc gystadlu yn Eisteddfod T y llynedd, yn ôl Yr Urdd.

Mae Rhestr Testunau 2021 a chyfarwyddiadau ar sut i gystadlu bellach wedi'u cyhoeddi, gyda chofrestru i gystadlu yn agor ar 1 Mawrth.

Bydd disgwyl i gystadleuwyr gyflwyno gwaith cyfansoddi, fideos o berfformiadau a lluniau o'u gweithiau creadigol o flaen llaw.

Bydd y rowndiau terfynol yn cael eu darlledu mewn cyfres o raglenni ar S4C a BBC Radio Cymru dros bum diwrnod - rhwng dydd Llun, 31 Mai a dydd Gwener, 4 Mehefin.

'Sêr TikTok y dyfodol'

"Mi ydan ni'n benderfynol o gynnal Eisteddfod T fwy arbrofol, arloesol a chyffrous nac erioed o'r blaen," meddai Cyfarwyddwr yr Eisteddfod, Siân Eirian.

"Dyma gyfle i feithrin ac arddangos talent o bob math, o gantorion a llenorion i sêr TikTok y dyfodol.

"Yn ogystal â'r cystadlaethau mwy traddodiadol fel llefaru neu'r alaw werin, mae modd i unigolion, grwpiau mewn 'swigod' a theuluoedd gymryd rhan mewn cystadlaethau mwy anffurfiol.

"Mae yna hyd yn oed cystadlaethau i athrawon ac aelodau hŷn o'r Urdd!

"Rydan ni'n gobeithio bydd yr arlwy amrywiol yn plesio ein Heisteddfodwyr arferol, ond yn denu llawer o'r newydd, hefyd."

Mae Eisteddfod T yn chwarae ar eiriau a'r syniad o 'ti' a 'tŷ'

Dywedodd Amanda Rees, Cyfarwyddwr Creadigol Cynnwys S4C, fod Eisteddfod T wedi "codi calonnau a dod â hwyl i gannoedd o deuluoedd yn ystod cyfnod anodd a thywyll y llynedd".

"Mae S4C yn falch iawn o gydweithio gydag Urdd Gobaith Cymru eto, gan ddarlledu mwy o oriau eleni yn llinol ac ar draws ein platfformau digidol drwy gydol yr wythnos," meddai.

Dywed Rhuanedd Richards, Golygydd BBC Radio Cymru a Cymru Fyw, ei bod hi "mor bwysig fod ein plant a'n pobl ifanc yn parhau i gael llwyfan cenedlaethol er mwyn dangos eu doniau a'u sgiliau".

Y bwriad bellach yw cynnal Eisteddfod yr Urdd Sir Ddinbych yn 2022 - dwy flynedd yn hwyrach na'r disgwyl.

Bydd Eisteddfod yr Urdd Sir Gaerfyrddin yn symud i 2023, ac Eisteddfod yr Urdd Maldwyn i 2024.

Mae'r mudiad wedi dweud eu bod nhw wedi colli £14m o incwm yn ystod 2020, ac yn wynebu dyled o £3.5m.

Dywed yr Urdd mai dyma'r "cyfnod mwyaf heriol yn ei 98 mlynedd o hanes" gyda dros 160 aelod staff wedi gadael allan o gyfanswm o 328.