Buddugoliaeth ysgubol i Forgannwg yn erbyn Caint

David Lloyd sgoriodd y rhediadau i ennill

Cafodd tîm criced Morgannwg eu buddugoliaeth gyntaf y tymor hwn yn erbyn Caint ddydd Gwener, ond roedd yn fuddugoliaeth ysgubol.

Fe ddechreuodd Morgannwg ail ddiwrnod y gêm ar 109 am 2, a heblaw am gyfraniad o 62 gan David Lloyd doedd y batiad ddim yn un disglair.

Serch hynny fe lwyddodd y tîm cartref i gyrraedd 197 yn eu batiad cyntaf, ac yna daeth cyfle arall i'r bowlwyr serennu.

Michael Hogan oedd y gorau ohonyn nhw, gan gipio 5 wiced am 28 rhediad yn unig wrth i fatiad Caint ddymchwel.

Pan gollon nhw'u wiced olaf gyda'r cyfanswm ar 74, roedd hynny'n gadael Morgannwg angen 16 yn unig i ennill y gêm.

Fe sicrhaodd David Lloyd eu bod yn gwneud hynny, gan sgorio 19 oddi ar 8 pelen yn unig, a gorffen y fuddugoliaeth gyda chwech anferth dros y ffin.

Buddugoliaeth felly i Forgannwg, a hynny o 10 wiced.

Morgannwg v. Caint - Sgôr terfynol

Caint - (batiad cyntaf) 138

(ail fatiad) 74

Morgannwg - (batiad cyntaf) 197

(ail fatiad) 19 heb golli wiced