Rhybudd melyn am law trwm yn rhannau deheuol Cymru

Mae'r rhybudd yn berthnasol mewn 15 o siroedd Cymru

Mae rhybudd melyn am law trwm mewn grym yn ardaloedd deheuol Cymru, a bydd yn para tan 23:59 nos Sadwrn.

Roedd 16 o rybuddion 'byddwch yn barod' am lifogydd mewn grym ar draws Cymru erbyn prynhawn Sadwrn, yn bennaf yn y canolbarth a'r de orllewin.

Dywedodd y Swyddfa Dywydd y gallai ysbeidiau trwm o law cyson, yn arbennig fore Sadwrn, achosi dŵr ar rai ffyrdd a thrafferthion i deithwyr.

Gallai rhwng 25mm a 50mm o law syrthio ym mwyafrif yr ardaloedd ble mae'r rhybudd mewn grym, a rhwng 75mm a 125mm o bosib dros rannau o Fannau Brycheiniog.

Wedi'r cawodydd yn y bore, mae disgwyl i'r glaw ostegu mewn rhai mannau yn y prynhawn cyn rhagor o gawodydd trwm wrth iddi nosi.

Mae'r rhybudd yn berthnasol i fannau yn y siroedd canlynol:

• Abertawe

• Blaenau Gwent

• Bro Morgannwg

• Caerdydd

• Caerfyrddin

• Caerffili

• Casnewydd

• Castell-nedd Port Talbot

• Merthyr Tudful

• Mynwy

• Penfro

• Pen-y-bont ar Ogwr

• Powys

• Rhondda Cynon Taf

• Torfaen