Y Bencampwriaeth: Abertawe 0-0 Millwall
- Cyhoeddwyd
Un gêm mae Abertawe wedi ennill y tymor yma a hynny oddi cartref yn erbyn Bristol City
Mae Abertawe yn dal i chwilio am fuddugoliaeth gynta'r tymor gartref yn y gynghrair ar ôl gêm ddi-sgôr arall yn erbyn Millwall.
Hon oedd y drydedd gêm i orffen 0-0 yn Stadiwm Liberty y tymor yma, gyda dim un tîm yn cael cyfle gwirioneddol yn yr hanner cyntaf.
Cafodd Michael Obafemi o Abertawe a'r Cymro Tom Bradshaw o Millwall gyfle i ennill y gêm yn yr ail hanner, gan ddod yn agos at sgorio.
Ond yn y diwedd roedd gêm gyfartal yn ganlyniad teg mewn gêm heb lawer o gyfnodau cyffrous.
Mae'r canlyniad yn golygu bod dechrau rhwystredig y tymor yn parhau i'r hyfforddwr newydd Russell Martin, sydd ag un fuddugoliaeth mewn gêm gynghrair i'w enw ers cymryd yr awenau.
Mae'r Elyrch nawr yn 20fed yn y tabl, dim ond un pwynt yn uwch na'r pedwar sydd ar y gwaelod.