Morgannwg yn sgorio bron i 400 yn erbyn Surrey
- Cyhoeddwyd
Mae David Lloyd wedi rhoi Morgannwg mewn sefyllfa gref
Mae Morgannwg mewn sefyllfa addawol ar ddiwedd diwrnod cyntaf gêm olaf y tymor yn y Bencampwriaeth gyda sgôr o 379-4 yn erbyn Surrey.
Sgoriodd David Lloyd 121 i'r Cymry ar yr Oval - y tro cyntaf iddo gyrraedd 100 o rediadau wrth agor y batio i'r sir.
Fe sgoriodd Joe Cooke 68, cyn i Lloyd golli ei wiced gyda Morgannwg yn 289 am bedair wiced.
Bydd Kiran Carlson (45 heb fod allan) a Chris Cooke (44 heb fod allan) yn gobeithio ychwanegu at y sgôr ar yr ail ddiwrnod ddydd Mercher.