Y Bencampwriaeth Rygbi Unedig: Gweilch 13-27 Sharks
- Cyhoeddwyd
Cafodd y Gweilch siom nos Wener wrth fethu â sicrhau eu trydedd fuddugoliaeth yn olynol ar ddechrau'r Bencampwriaeth Rygbi Unedig, serch ymddangosiad cyntaf capten Cymru, Alun Wyn Jones i'r rhanbarth ers taith y Llewod.
Sgoriodd Gareth Anscombe bwyntiau cyntaf y gêm gyda dwy gic gosb, wnaeth ymestyn ei record gicio berffaith ers dechrau'r tymor - 13 allan o 13.
Ond fe wnaeth dwy gic adlam Boeta Chamberlain wneud hi'n gyfartal 6-6 cyn i'r Sharks fynd ati i agor bwlch sylweddol.
Roedd yna geisiau yn yr ail hanner i'r gwrthwynebwyr o Dde Affrica gan Jeremy Ward a Marnus Potgieter, trydedd gic adlam gan Chamberlain a chic gosb gan Ruan Pienaar.
Sgoriodd Gareth Thomas gais gysur hwyr i'r Gweilch ac fe ychwanegodd Stephen Myler at y pwyntiau gyda'i drosiad i wneud y sgôr yn 13-24.
Ond fe gafodd y tîm ei gosbi'n haeddiannol am gamgymeriadau diangen drwy'r gêm a'r Sharks gafodd y gair olaf.
Y sgôr terfynol, wedi cic gosb olaf Pienaar, oedd 13-27 gan sicrhau buddugoliaeth gyntaf y Sharks yn y bencampwriaeth.