Caerdydd: Trafferthion teithio i nifer ar ôl i drên daro person

Roedd nifer o deithwyr yn aros y tu allan i Orsaf Caerdydd

Mae nifer o bobl wedi wynebu trafferthion teithio ar ôl i berson gael ei daro gan drên yng Nghaerdydd.

Cafodd nifer o drenau eu canslo wedi'r digwyddiad yng Ngorsaf Ganolog Caerdydd ddydd Sul.

Mae Heddlu Trafnidiaeth wedi cadarnhau bod y person wedi cael ei gludo i'r ysbyty wedi iddo gael anafiadau sy'n bygwth ei fywyd.

Ychwanegodd plismyn "nad oedd y digwyddiad yn cael ei drin fel un amheus".

Ar un adeg roedd degau o deithwyr i'w gweld y tu allan i'r orsaf, tra bod cwmni Trafnidiaeth Cymru yn nodi bod oedi i nifer o deithiau.

Mae rheilffyrdd bellach wedi ailagor ond mae yna rybudd i deithwyr wirio amserlenni cyn teithio.