Canslo apwyntiadau yn sgil angladd y Frenhines

Bydd rhai apwyntiadau ysbyty yn cael eu canslo ddydd Llun yn dilyn cadarnhad y bydd diwrnod angladd y Frenhines Elizabeth II yn ŵyl banc.

Dywed Bwrdd Iechyd Aneurin Bevan na fydd y rhan fwyaf o apwyntiadau a drefnwyd o flaen llaw yn digwydd oni bai bod y mater yn un brys.

Bydd y mwyafrif o feddygfeydd a fferyllfeydd ar gau hefyd.

Dywed Llywodraeth Cymru bod disgwyl i awdurdodau iechyd weithredu fel y maent yn arfer ei wneud ar wyliau banc arferol.

Bu farw'r Frenhines ddydd Iau yn Balmoral ac yn dilyn ei marwolaeth fe wnaeth y Brenin Charles III roi sêl bendith i ddiwrnod angladd ei fam fod yn ŵyl banc.

• Ymweliadau'r Frenhines â Chymru ar hyd y blynyddoedd

Mae datganiad gan Fwrdd Iechyd Aneurin Bevan yn nodi y byddant yn cysylltu â chleifion i newid y trefniadau.

"Bydd ein gwasanaethau gofal brys yn parhau ddydd Llun. Ry'n ni'n ymddiheuro am unrhyw anghyfleustra," medd y datganiad.

Mae Bwrdd Iechyd Cwm Taf Morgannwg wedi cadarnhau y bydd apwyntiadau brechiadau atgyfnerthol Covid yr hydref yn cael eu cynnal yn ardaloedd cynghorau Merthyr Tudful, Rhondda Cynon Taf a Phen-y-bont.

Bydd chwe chanolfan frechu y bwrdd ar agor ddydd Llun ond os oes rhywun yn dymuno newid ei apwyntiad, yn sgil yr angladd, mae modd aildrefnu.

Mae disgwyl i'r Brenin Charles III a'r Frenhines Gydweddog, Camilla, ddod i Gymru ddydd Gwener fel rhan o'u taith i'r gwledydd datganoledig

Dywedodd Bwrdd Iechyd Powys y byddant yn cysylltu â'u cleifion petai newid yn y trefniadau ond y bydd brechiadau Covid yn dal i ddigwydd.

Ychwanegodd Bwrdd Iechyd Betsi Cadwaladr y dylai cleifion gymryd bod eu hapwyntiad yn mynd yn ei flaen oni bai eu bod yn clywed yn wahanol.

Mae disgwyl i bob meddygfa fod ar gau yn ogystal â deintyddfeydd.

Dywed Llywodraeth Cymru ei bod wedi ysgrifennu at bob sefydliad GIG er mwyn sicrhau bod gwasanaethau brys yn parhau ynghyd â rhai gwasanaethau gofal eraill - yn fwyaf arbennig triniaethau clinigol brys a thriniaethau canser.

"Ry'n hefyd yn gofyn i sefydliadau sicrhau bod staff, cleifion a'r cyhoedd yn ymwybodol o'r newidiadau," medd llefarydd.

Aildrefnu amlosgiadau

Nid gwasanaethau iechyd yn unig fydd yn newid eu trefniadau ddydd Llun - mae amlosgiadau yn siroedd Pen-y-bont a Phenfro wedi'u haildrefnu.

Ni fydd cynghorau Powys, Abertawe a Phenfro yn casglu unrhyw sbwriel na gwastraff ailgylchu.

Mae Cyngor Abertawe wedi cadarnhau hefyd y bydd ysgolion, adeiladau cyngor, llyfrgelloedd, amgueddfeydd, canolfannau cymunedol a'r farchnad ar gau.

Mae Amgueddfa Cymru yn dweud y bydd pob un o'u hamgueddfeydd a'u canolfannau arddangos ar gau.