Bale yn dangos ei werth cyn Cwpan y Byd
- Cyhoeddwyd
Mae gan Gareth Bale allu rhyfeddol i sgorio yn y gemau pwysig
Fe ychwanegodd Gareth Bale fedal arall i'w gasgliad disglair pan sgoriodd e gôl allweddol i Los Angeles FC i'w helpu i ennill cwpan yr MLS am y tro cyntaf.
Peniodd y Cymro y bêl i'r rhwyd ddwy funud cyn diwedd yr amser ychwanegol i unioni'r sgôr yn 3-3 yn erbyn Philadelphia Union.
Fe enillodd Los Angeles FC y cwpan ar ôl ennill o 3-0 o giciau o'r smotyn.
Hwn yw'r tro cyntaf i'r clwb ennill y tlws ers iddyn nhw ymuno gyda'r MLS, prif gynghrair Gogledd America yn 2018.
Roedd Bale ar y fainc ar ôl gwella o anaf i'w goes sydd wedi amharu ar ei allu i chwarae'n rheolaidd.
"Mae hi o hyd yn braf i sgorio mewn rowndiau terfynol, mae'n ymddangos bod hynny yn dod yn naturiol i mi" meddai Bale.
"Mae hwn yn beth mawr. Mae'n bwysig i'r clwb. Mae'n bwysig i'r cefnogwyr."
Fe fydd cyfraniad Bale a'r ffaith ei fod e wedi gwella o'i anaf yn hwb mawr i Gymru.
Mae disgwyl i Rob Page gyhoeddi ei garfan fydd yn teithio i Gwpan y Byd yn Qatar ddydd Mercher.