Rhybudd melyn am wynt a glaw ar draws Cymru ddydd Iau
- Cyhoeddwyd
Mae cannoedd o gartrefi wedi bod heb drydan ddydd Iau yn dilyn cyfnod o dywydd garw.
Roedd y Swyddfa Dywydd yn rhybuddio bod disgwyl glaw trwm a gwyntoedd cryfion ymhob rhan o Gymru ddydd Iau.
Daeth y rhybudd melyn i rym am 10:00 ac mae'n para tan 19:00.
Ar un adeg roedd tua 1,000 o gartrefi heb drydan ar hyd de a gorllewin Cymru, meddai'r Grid Cenedlaethol.
Dywedon nhw bod disgwyl i gyflenwadau gael eu hadfer erbyn ganol y prynhawn.
Yn y gogledd, dywedodd SP Energy Networks bod namau gyda rhai cysylltiadau ar Ynys Môn.
Mae amryw o rybuddion llifogydd hefyd mewn grym gan Gyfoeth Naturiol Cymru, dolen allanol.
Bu'n rhaid cau rhan o'r A470 wedi i goeden syrthio, gan effeithio ar deithwyr rhwng Llanelwedd a Llys-wen
Mewn mannau arfordirol roedd disgwyl i'r gwyntoedd gyrraedd rhwng 60 a 70mya, yn enwedig yn siroedd Penfro, Gwynedd ac Ynys Môn.
Ac mewn mannau lle mae'r tir yn wlyb iawn yn barod, roedd rhybudd bod llifogydd a thrafferthion teithio yn bosib.
Roedd y tywydd garw eisoes yn cael effaith brynhawn Mercher, a bu'n rhaid cau'r A470 yn ardal Erwyd ym Mhowys oherwydd llifogydd.
Mae sawl coeden hefyd wedi syrthio yn yr ardal, yn dilyn yr hyn y mae'r cyngor sir wedi ei ddisgrifio fel "corwynt bach" gan effeithio ar bobl sy'n teithio rhwng Llanelwedd a Llys-wen.
Roedd effaith y gwyntoedd cryfion i'w weld yn glir ar y prom yn Aberystwyth fore Iau
Yn Sir Gaerfyrddin bu'n rhaid cau yr A4066 ar ôl i goeden ddisgyn rhwng Llanmilo a Thalacharn.
Bu'n rhaid cau ardal glan môr pentref Amroth dros nos wrth i'r llanw uchel daflu cerrig mân a malurion ar hyd y ffordd.