Sgomer: Achub pysgotwyr o rafft bywyd ar ôl taro creigiau

Y gred yw bod y pysgotwyr wedi taro creigiau ger Ynys Sgomer, oddi ar arfordir Sir Benfro

Mae pedwar o bysgotwyr wedi eu hachub oddi ar arfordir Sir Benfro ar ôl gorfod gadael eu cwch yn ystod oriau mân bore Mercher.

Cafodd y dynion eu canfod ar rafft achub bywyd ger Ynys Sgomer.

Y gred yw bod y cwch wedi taro creigiau yn yr ardal tua hanner nos.

Cafodd dau fad achub eu hanfon i'r digwyddiad, ac fe gafodd y dynion eu cludo i'r lan.

Dywedodd Gwylwyr y Glannau nad oedd y dynion wedi eu hanafu.

Mae'r cwch pysgota yn parhau ger Ynys Sgomer, a bwriad Gwylwyr y Glannau yw archwilio'r ardal am lygredd fore Mercher.