Llun o'r Wyddfa 'dafliad carreg' o Aberystwyth!
- Cyhoeddwyd
Yr Wyddfa o Aberystwyth, Rhagfyr 12, 2022
Wrth i ffotograffwyr heidio allan yr wythnos yma i fanteisio ar yr amodau clir a'r golygfeydd tlws o'r eira mae na luniau trawiadol o Gymru wedi eu postio ar gyfryngau cymdeithasol, gan gynnwys y llun yma gan Scott Waby o'r Wyddfa fel pe bai ond dafliad carreg o dref glan môr Aberystwyth.
Mae'r ffordd mae wedi tynnu'r llun yn gwneud i orsaf trên bach Constitution Hill - Craig-glais yn Gymraeg - ymddangos fel pe bai wedi ei leoli bron ar lethrau'r Wyddfa!
Mae Scott wedi esbonio sut gafodd yr effaith: "Fe dynais i'r llun o gofeb Wellington ar Ben Dinas ger Aberystwyth.
"Defnyddiais lens 600mm i ddod â'r blaendir a'r cefndir at ei gilydd.
"Mae tynnu llun Constitution Hill o ychydig dros filltir i ffwrdd gan ddefnyddio lens teleffoto yn gwneud i'r adeiladau ymddangos yn fawr yn y ffrâm. Mae hyn yn cywasgu'r persbectif, gan wneud i'r mynydd (sydd tua 45 milltir i ffwrdd) ymddangos yn fwy ac yn agosach na mae mewn gwirionedd.
"Mae'n effaith optegol cyffredin sy'n fwy amlwg yn yr achos yma oherwydd hyd ffocal hir iawn y lens."
Hefyd o ddiddordeb: