Merched pêl-droed Cymru i gael tâl cyfartal i'r dynion

Rhai o sêr timau Cymru - Jess Fishlock, Aaron Ramsey, Sophie Ingle a Brennan Johnson

Bydd dynion a merched Cymru'n cael eu talu yr un faint am chwarae pêl-droed dros eu gwlad o hyn ymlaen, a hynny am y tro cyntaf.

Dywedodd Cymdeithas Bêl-droed Cymru y byddai'r cytundeb yn dod i rym yn syth.

Er mwyn gwneud y cytundeb yn bosib mae dynion Cymru wedi cytuno i doriad o 25% i'w tâl nhw, gan olygu bod modd rhoi cynnydd o 25% i'r merched.

"Rydw i'n falch iawn am y tâl cyfartal, achos mae'n arwydd o gydraddoldeb," meddair rheolwr Merched Cymru, Gemma Grainger.

'Edrych i'r dyfodol'

Bydd y cytundeb tâl yn rhedeg hyd at 2027, gyda Chymru'n ymuno â gwledydd fel yr UDA, Lloegr, Brasil, Awstralia, Norwy a Seland Newydd i dalu eu timau'n gyfartal.

Fe ddechreuodd trafodaethau Cymru ar y mater ym mis Tachwedd 2021 gyda rhai o brif chwaraewyr y garfan, ac fe ddaethon nhw i gytundeb ar ôl i bob aelod o dîm y dynion gytuno i leihau eu ffioedd rhyngwladol nhw.

Mewn datganiad fe ddywedodd CBDC fod y cyhoeddiad yn ymgorffori eu hethos o fod 'Gyda'n Gilydd, Yn Gryfach'.

"Ni'n obeithiol y bydd hyn yn sicrhau bod sêr y dyfodol, bechgyn a merched, yn gweld bod cyfartaledd ar draws pêl-droed rhyngwladol Cymru, sydd yn rhan hynod bwysig o gymdeithas," meddai'r datganiad.

Mae gan Jess Fishlock 136 cap dros Gymru, mwy nag unrhyw chwaraewr arall yn hanes timau'r merched a dynion

Wrth ymateb i'r cyhoeddiad dywedodd prif weithredwr CBDC, Noel Mooney fod y gymdeithas yn ceisio "edrych i'r dyfodol".

"Mae'r cytundeb yma yn gam arall tuag at fod yn un o fudiadau chwaraeon gorau'r byd, a hoffwn i ddiolch i'r timau Dynion a Menywod am gydweithio'n wych i sicrhau bod y cytundeb yn cael ei gwblhau."

Bydd dynion Cymru yn dechrau eu hymgyrch ragbrofol ar gyfer Euro 2024 ym mis Mawrth, gan wynebu Croatia, Twrci, Armenia a Latfia yn eu grŵp rhagbrofol.

Ar ôl methu allan o drwch blewyn ar le yng Nghwpan y Byd eleni, her nesaf tîm y merched fydd cystadleuaeth newydd Cynghrair y Cenhedloedd sy'n dechrau ym mis Medi eleni, ac yn dylanwadu ar grwpiau rhagbrofol Euro 2025.