Naw pafiliwn, miloedd o luniau: Atgofion Eisteddfodau Arwyn Herald

Roedd Arwyn 'Herald' Roberts wedi gweithio yn tynnu lluniau yn yr Eisteddfod Genedlaethol am 40 mlynedd.

Yn gynharach yr wythnos hon fe gyhoeddodd yr Eisteddfod Genedlaethol y byddai dwy ganolfan gystadlu newydd ar y Maes eleni ym Moduan, fydd yn llai na'r pafiliwn traddodiadol.

Un sy'n ymwybodol iawn o'r pafiliynau amrywiol sydd wedi bod ar feysydd yr Eisteddfod dros y blynyddoedd yw'r ffotograffydd Arwyn 'Herald' Roberts.

Am dros 40 mlynedd roedd Arwyn yn troedio meysydd y Brifwyl yn cofnodi'r hwyl ar y maes carafanau, y nerfusrwydd gefn llwyfan ac enillwyr y prif seremonïau.

Ar ôl treulio oriau yn mynd trwy ei gasgliad o luniau, fe ddewisodd Arwyn Herald rai o'i uchafbwyntiau drwy ei lens ym mhafiliwn yr Eisteddfod Genedlaethol dros y blynyddoedd.

"Yr Eisteddfod gyntaf un i mi weithio arni oedd ym 1979 yng Nghaernarfon, a'r pafiliwn anferth o drwm, wnaeth orffen ei oes yn y diwedd ym Mhorthmadog, lle fuodd yn sefyll fel sied ddefaid am flynyddoedd maith wedyn.

"Erbyn y 1990au daeth y pafiliynau lliwgar, y rhai glas a melyn, ac wedyn gwyrdd a melyn, cyn newid wedyn i'r pafiliwn pinc, lle'r oedd pawb yn ei galw hi'n 'hwch ar ei chefn,' meddai.

Arwyn Roberts

Pafiliwn gwahanol i'r arfer oedd honno yn 1993 pan oedd yr Eisteddfod Genedlaethol ar Faes y Sioe Fawr yn Llanelwedd

Un Brifwyl benodol sy'n aros yn y cof i Arwyn yw'r Eisteddfod genedlaethol ar Faes y Sioe Fawr yn Llanelwedd ym 1993.

Roedd y pafiliwn yn y sied fawr a Meirion MacIntyre Huws yn ennill y gadair. Mae Arwyn yn cofio cael ffrae gan un o Brifeirdd amlycaf Cymru am beidio bod yno ar amser.

"Dwi'n cofio bod tu allan i sied y gwartheg efo'r diweddar Gerallt Lloyd Owen, ac fe ofynnodd i mi 'Be' wyt ti'n da yn fan 'ma?'

"'Fe a'i fewn yn y munud,' medde fi. Dyma fo'n ateb: 'Dos i mewn rŵan, mae dy angen di yna.'

"Wrth gwrs y fo oedd beirniaid y gadair y flwyddyn honno, ac roedd o'n gwybod fod teilyngdod ac angen i mi fod yno i dynnu lluniau," meddai.

Roedd y rhain ond yn rhai o uchafbwyntiau Arwyn.

Gwyliwch y fideo uchod i weld rhagor o'i ddewisiadau a lluniau o bafiliynau'r Eisteddfod Genedlaethol dros y pedwar degawd diwethaf.

Pynciau cysylltiedig

Straeon perthnasol